قازاقستاندىق جۋرناليست ازامات بيتان شىعىس قازاقستان وبلىسىنىڭ اكىمى دانيال احمەتوۆكە سەمەي قالاسىنداعى ءالى كۇنگە «قىزىل كوسەم» ۆ. لەنيننىڭ اتىمەن اتالىپ كەلە جاتقان كوشەگە الاشقا ابايدى تانىتقان، شاكەرىمدى اقتاپ العان، ءاليحان بوكەيحانوۆ، احمەت بايتۇرسىن ۇلى باستاعان ۇلت زيالىلارىنىڭ ەسىمدەرىن، ەڭبەكتەرىن جاڭعىرتقان عالىم-وقىتۋشى قايىم مۇحامەدحان ۇلىنىڭ ەسىمىن بەرۋدى ۇسىندى، - دەپ حابارلايدى «قامشى» پورتالى.
«قۇرمەتتى دانيال احمەتوۆ! ءبىزدىڭ ۇسىنىسىمىز وسى كىسىنىڭ ەسىمىمەن بايلانىستى بولىپ وتىر. تارقاتىپ ايتار بولساق، تاۋەلسىزدىگىمىزدىڭ 25 جىلدىعى مەرەيتويى قارساڭىندا سەمەي قالاسىنداعى ماڭىزى جاعىنان وتە ۇلكەن ورىن الاتىن، ورتالىقتا ورنالاسقان لەنين اتىنداعى كوشە اتاۋى قايىم مۇحامەدحان ۇلىنىڭ ەسىمىمەن اۋىستىرىلسا، بۇل تەك سەمەيلىكتەر ءۇشىن ەمەس، تۇتاس قازاق جۇرتى ءۇشىن وڭ وزگەرىس، قۇتتى جاڭالىق بولار ەدى دەپ ايتقىمىز كەلەدى. ونىڭ ۇستىنە بيىل قايىم اتامىزدىڭ سەمەي توپىراعىندا دۇنيەگە كەلگەنىنە 100 جىل تولىپ وتىر. سوندىقتان، دا ول كىسىگە باسشىلىق تاراپىنان وسىنداي قۇرمەت كورسەتىلىپ جاتسا، القالاعان الەۋمەتتىڭ سىزگە ايتار العىسى مول دەپ بىلگەيسىز» دەلىنگەن اكىم اتىنا جازىلعان ۇندەۋدە.
سونداي-اق، جۋرناليست وبلىس باسشىسىنىڭ نازارىن بۇگىنگى ەگەمەن ەلدىڭ جاستارى ءۇشىن لەنيننىڭ ەشكىم ەمەستىگىنە اۋدارتادى.
«ونىڭ تىكەلەي بۇيرىعىمەن قازاق حالقىنا جاسالعان قاستاندىقتارى، اۋىر قىلمىستارى مىنا ۋاقىتتا ەشكىمگە دە قۇپيا بولماي قالدى. سول سەبەپتى دە بۇل اتاۋ ءبىر كەزدەرى الاش زيالىلارىنىڭ مادەني-رۋحاني ورتالىعىنا اينالعان سەمەي قالاسىنىڭ كارتاسىنان مۇلدە سىزىلىپ تاستالۋى كەرەك دەگەن ۇستانىمدامىز» دەيدى باستاما كوتەرۋشى جۋرناليست.
