تاۋەلسىزدىكتىڭ 25 جىلدىعىندا وتانداستارىمىز ريزاشىلىق كۇنىن اتاپ وتەدى، - دەپ حابارلايدى "قامشى" پورتالى.

بۇل جونىندە ورتالىق كوممۋنيكاسيالار قىزمەتىندە وتكەن بريفينگتە «قوعامدىق كەلىسىم» رەسپۋبليكالىق مەملەكەتتىك مەكەمەسىنىڭ ديرەكتورى ناتاليا كالاشنيكوۆا مالىمدەدى. ايتۋلى شارا ناۋرىزدىڭ 1 كۇنى قازاقستان حالقى اسسامبلەياسىنىڭ قۇرىلعان كۇنى تويلانۋى مۇمكىن دەگەن جورامال بار. ال قايىرىمدىلىق جاسايمىن دەگەن جانعا «مەسەنات.كز» ينتەرنەت-پورتالى كومەكشى قۇرال بولا الادى. وندا باي-باعىلانداردىڭ ءتىزىمى كورسەتىلگەن. كومەك سۇراپ، تىكەلەي حابارلاسۋعا بولادى.

ناتاليا كالاشنيكوۆا، ق ر پرەزيدەنتى جانىنداعى «قوعامدىق كەلىسىم» رمم ديرەكتورى:

- كومەككە ءزارۋ وتانداستارىمىز حابارلاسا الادى. ماسەلەن، «قورجىن» مەيىرىمدىلىك كەرۋەنىنەن باستاۋ العان «اسىل بالا» جوباسىنىڭ اياسىندا 16 ءوڭىر بويىنشا سىرقاتى اۋىر بالالارعا مەسەناتتار كومەكتەسىپ جاتىر. بۇل جۇمىس بيىل دا جالعاسىن تابادى. سونداي-اق ناتاليا كالاشنيكوۆانىڭ ايتۋىنشا، قازاقستان حالقى اسسامبلەياسى ۇلت جوسپارىننىڭ ورىندالۋىنا ۇلەس قوسۋمەن قاتار ونى نىعايتۋعا دا اتسالىسادى. ال تاۋەلسىزدىكتىڭ 25 جىلدىعىندا مىڭنان استام ءىس-شارا جانە ازياداعى ءوزارا سەنىم جانە ىس-ارەكەت كەڭەسىنە قاتىسۋشى ەلدەردىڭ ەتنومادەني بىرلەستىكتەرىمەن فورۋم وتكىزبەك.