وسى جىلدىڭ 1 قاڭتارىنان باستاپ قازاقستاندا ۇيالى بايلانىس جۇيەسىنە وزگەرىس ەنگىزىلىپ، بايلانىس قىزمەتىن پايدالانۋشىلار تەلەفون نومىرلەرىن وزگەرتپەي-اق باسقا وپەراتورلار قىزمەتىنە اۋىسۋعا مۇمكىندىك العانى بەلگىلى. وسى ورايدا، تۇتىنۋشىلار اراسىندا سويلەسەتىن ادامنىڭ ءنومىرى باسقا وپەراتورعا اۋىسقان-اۋىسپاعانىنا قاتىستى زاڭدى سۇراق تۋىندايتىنى بەلگىلى. «قامشى» پورتالى وسى سۇراققا جاۋاپ ىزدەپ كوردى.
بۇرىن تەلەفون ءنومىرىنىڭ باستاپقى ءتورت سانىنا قاراپ انىقتاۋعا بولاتىن بايلانىس وپەراتورلارى شىنىمەن دە جاڭا جۇيەگە ساي ءبىراز قيىندىقتار تۋعىزۋى مۇمكىن. سونداي قيىندىقتارعا تاپ بولماۋ ءۇشىن جانە قاراجاتىڭىزدى ۇنەمدەۋ ءۇشىن مىنانى ەسكە ساقتاڭىز.
ەگەر ءسىز التەل (Altel) بايلانىس وپەراتورىنىڭ تۇتىنۋشىسى بولساڭىز
كومپانيانىڭ call ورتالىعىندا (8 800 080 00 11) بۇل ماسەلە اۆتوماتتاندىرىلعان تۇردە شەشىلگەنىن حابارلادى. ياعني، ءسىز ءوزىڭىزدىڭ التەل نومىرىڭىزدەن بۇرىن وسى بايلانىس وپەراتورىندا بولعان نومەرگە تەلەفون شالساڭىز، ونىڭ باسقا وپەراتورعا اۋىسقانى تۋرالى اۆتوماتتى تۇردە سىزگە جاۋاپ قايتارىلادى جانە بۇل قىزمەت ءۇشىن اقى الىنبايدى.
ەگەر ءسىز Tele2 بايلانىس وپەراتورىنىڭ تۇتىنۋشىسى بولساڭىز
بۇل بايلانىس وپەراتورى اتالعان اۆتوماتتى قىزمەتتى ازىرلەپ جاتقانىن ايتادى. جاقىن كۇندەرى قولدانىسقا ەنگىزىلەتىن جۇيەنىڭ جاي-جاپسارى تۋرالى تەلە 2 بايلانىس قىزمەتىنىڭ ديسپەچەرلەرىنەن سۇراي الاسىز.
«اكتيۆ» ي Kcell
بۇل بايلانىس وپەراتورلارى تەلەفون شالىناتىن ءنومىر تۋرالى مالىمەت الۋدىڭ ەكى جولىن ۇسىنادى.
- *199*ابونەنت ءنومىرى# كومبيناسياسىن تەرۋ. سىزگە سمس تۇرىندە جاۋاپ كەلەدى.
- قوڭىراۋ شالۋ كەزىندە ءبىر قىسقا دىبىس (گۋدوك) جانە ەكى ۇزاق دىبىس بەرىلەدى. بۇل ارعى بەتتەگى ابونەنت وپەراتورىن اۋىستىرعانىن بىلدىرەدى.
ەكى قىزمەت تە اقىسىز.
«بيلاين»
اتالعان وپەراتور دا اۆتوماتتى جاۋاپ بەرۋ قىزمەتىن ىسكە قوسقان. ەگەر ءسىز قوڭىراۋ شالعان ءنومىر وپەراتورى اۋىسقان بولسا بىردەن ول تۋرالى حابارلايدى جانە بايلانىس ءۇشىن الىناتىن قاراجات سوماسىن ەسكەرتەدى. بۇل قىزمەت تە – اقىسىز.
