بەلگىلى ءانشى، «وتىرار سازى» وركەسترىنىڭ نەگىزىن قالاۋشىلاردىڭ ءبىرى ەرمەك ابىلدايەۆ نۇرعيسا تىلەندييەۆتىڭ قىزى، باس ديريجەر دينارا تىلەندييەۆاعا قاتىستى مادەنيەت مينيسترىنە اشىق حات جازدى، - دەپ حابارلايدى «قامشى» پورتالى stan.kz- كە سىلتەمە جاساپ.

ەرمەك ابىلدايەۆ حاتىندا نۇرعيسا تىلەندييەۆپەن بىرگە وركەستر ءانشىسى بولىپ 18 جىل بىرگە ىستەسكەنىن، وركەستردە 32 جىل ەڭبەك اتقارعانىن بايانداي كەلە، قازىرگى باس ديريجەر دينارا تىلەندييەۆانىڭ ونى شىعارماشىلىق ۇجىمعا جولاتپاي قويعانىنا شاعىمدانادى. ءانشىنىڭ مادەنيەت جانە سپورت مينيسترىنە جولداعان اشىق حاتى «قالا مەن دالا» گازەتىندە جاريالاندى. 

ءانشىنىڭ ايتۋىنشا، ول نۇرعيسا تىلەندييەۆتىڭ باسقارۋىمەن بىرنەشە دۇركىن جەكە شىعارماشىلىق كونسەرتىن وتكىزگەن. وركەسترگە قاتىستى ماسەلەلەردە ءاردايىم اتسالىسىپ كەلگەنىن ايتادى.

“شىنىن ايتاتىن بولسام، ەندىگى ماسەلە ديناراعا (ءدىنزۋحرا) بايلانىستى. ونى جۇمىسقا الۋ وڭاي بولمادى. فيلارمونيا اكىمشىلىگى جانە كوللەكتيۆ ونى ەش قولدامادى”، – دەيدى ابىلدايەۆ جازباسىندا.

ەرمەك ابىلدايەۆ مۇحتار قۇلمۇحاممەد مادەنيەت ءمينيسترى بولىپ تۇرعاندا، دينارا تىلەندييەۆانى “وتىرار سازىنىڭ” باس ديريجەرى ەتىپ سايلاۋعا ءوزى اتسالىسقان كورىنەدى. ءتىپتى فيلارمونيا ۇجىمىنىڭ قارسىلىعىنا قاراماستان، دينارا ءمينيستردىڭ الدىندا ونەر كورسەتۋى ءۇشىن “قاسارىسىپ تۇرىپ العان”.

“قايتسەك تە دينارانى مينيسترگە كورسەتۋىمىز» كەرەك دەدىم. فيلارمونيا اكىمشىلىگى «ونى مينيسترگە كورسەتۋگە بولمايدى، شيكى، تاجىريبەسى جوق ۇياتقا قالامىز» دەپ شىقتى. مەن قاسارىسىپ تۇرىپ العان سوڭ، شىقسا دا «اتا تولعاۋىمەن» شىقسىن دەدى. «جوق! ماحامبەتپەن شىعادى»، دەدىم. وعان ءوزى دايىندالعان. مەملەكەتتىك ەمتيحاندا ديريجەرلىق جاساعان”، – دەگەن ءانشى حاتىندا.

“بۇل تىلەندييەۆتىڭ وركەسترى، دينارا – تىلەندييەۆتىڭ قىزى. سوندىقتان بۇگىننەن باستاپ، وركەستردىڭ باستىعى دينارا بولادى»، –دەدى. ءبىز قۋانىپ كەتتىك”، – دەپ اڭگىمەسىن جالعاستىردى ەرمەك ابىلدايەۆ.
دينارانىڭ باس ديريجەر بولۋىنا بەلسەنە كىرىسكەن ءانشى ەندى تىلەندييەۆتىڭ قىزى ءوزىن وركەستردىڭ كونسەرتتەرىنە قاتىستىرمايتىنىنا كەيىگەن. ءتىپتى نۇرعيسانىڭ 90-جىلدىعىنا ارنالعان كەشتە دە ەرمەك ابىلدايەۆ ساحناعا شىعا الماپتى.

“كۇشىكتى اسىراپ باقتىم، يت بولىپ ءوزىمدى قاپتى» دەمەكشى… تاعى ءبىر ماسەلەنى ايتا كەتەيىن. 1985 جىلى – دينارا دۇنيەگە كەلگەن جىلى – نۇراعاڭ ءبىزدىڭ ۇيگە كەلدى. ودان بۇرىندا ءبىر سەبەپتەرمەن نۇراعاڭ ۇيىنە قونباي ونشاقتى كۇن ءبىزدىڭ ۇيدە جاتتى”،-دەپ ءانشى تىلەندييەۆپەن دوستىقتا بولعان جاقىن قارىم-قاتىناستارىن ايتا كەتەدى.

“ول كىسىنى مەنىڭ جۇبايىم مارقۇم ر. شاۋشييەۆا (ول دا كاسىبي ءانشى،حالىقارالىق انشىلەر كونكۋرسىنىڭ لاۋرەاتى ۇلاعاتتى ۇستاز بولاتىن) وتە جاقسى كۇتتى. رىسقاندى كەلىنىم دەپ جاقسى كورۋشى ەدى. داحادا ءسۇت جوق، دينارانى ەمىزۋ ءۇشىن تەك ساعان كەلدىم، باسقا ەشكىمگە سەنبەيمىن دەدى. ول كەزدە بالالارىمىز كىشكەنتاي اراسى ءبىر جاستان بولاتىن، ەڭ ۇلكەنى ءۇش جاستا ەدى”،-دەيدى ءانشى.

“سوعان قاراماي رىسحان مارحۇم ۇشەۋىن جەتەكتەپ الىپ، كۇندە بارىپ دينارانى ءبىر ايداي ەمىزدى. ول مارحۇم رىسحاننىڭ اق ءسۇتىن اقتامادى”،-دەيدى ءانشى.

“قاي جاعىنان الساڭىز دا، نۇراعاڭمەن ەكەۋىنىڭ اراسى جەر مەن كوكتەي.
مۇلدەم نۇراعاڭنان تۋماعان سياقتى! نۇراعاڭنىڭ بىردە-بىر قاسيەتى وعان دارىماعان”، – دەيدى ءانشى.

ءانشىنىڭ ايتۋىنشا، نۇرعيسا تىلەندييەۆ كونسەرتكە دايىندىقسىز ەشقاشان شىققان ەمەس. دينارا بولسا ءوزىنىڭ تۆورچەستۆولىق دەڭگەيىنە قاراماستان، كونسەرتكە ەش دايىندىقسىز شىعا بەرەدى ەكەن. جۇمىسقا ايلاپ كەلمەيدى. ۇجىممەن جۇمىسى جوق، كوللەكتيۆ تۋرالى ويلانبايتىن كورىنەدى.

جازباسىنىڭ سوڭىندا ەرمەك ابىلدايەۆ مينيستردەن «وتىرار سازى» وركەسترىمەن جەكە شىعارماشىلىق كونسەرتىن وتكىزۋگە قولداۋ كورسەتۋىن سۇراعان.