بۇۇ تۇراقتى ۇيلەستىرۋشىسى، بۇۇ دامۋ باعدارلاماسىنىڭ قازاقستانداعى وكىلى نوريماس شيمومۋرا ءال-فارابي اتىنداعى قازۇۋ-دا رەسمي ىس-ساپارمەن بولدى، - دەپ حابارلايدى «قامشى» پورتالى ۋنيۆەرسيتەتتىڭ باسپا ءسوز قىزمەتىنە سىلتەمە جاساپ.
كەزدەسۋ بارىسىندا تاۋەلسىزدىك العان ۋاقىتتان بەرى ۋنيۆەرسيتەت بۇۇ، الەمنىڭ ەڭ بەدەلدى حالىقارالىق ۇيىمنىڭ قىزمەتىنە ستۋدەنتتەر مەن عالىمداردى بەلسەندى تارتىپ كەلە جاتقاندىعى ايتىلدى. 2011 جىلى ۋنيۆەرسيتەت ورتالىق ازيا جوو اراسىندا ءبىرىنشى بولىپ بىرىككەن ۇلتتار ۇيىمىنىڭ (بۇۇ) باس حاتشىسى پان گي مۋننىڭ باستاماسىمەن قۇرىلىپ، اكادەميالىق ىقپالدىلىق (UNAI) باعدارلاماسىنا قوسىلدى. بۇۇ-مەن ىنتىماقتاستىق ورناتۋ ۋنيۆەرسيتەت ءۇشىن باسىمدىلىق بولىپ تابىلادى. UNAI باعدارلاماسى بۇۇ جەتەكشى قاعيداتتارىنا نەگىزدەلگەن الەمدەگى ەڭ ۇزدىك جوو-نىڭ ستۋدەنتتەرى مەن زياتكەرلىك ەليتانى بىرىكتىرەدى.
ەلباسىنىڭ تۇراقتى دامۋعا باعىتتالعان G-Global جانە «جاسىل كوپىر» يدەيالارىن جۇزەگە اسىرۋ ماقساتىندا قازۇۋ «Green Bridge through Generations» پلاتفورماسىن ازىرلەدى. 2012 جىلى ريو-دە-جانەيرودا وتكەن «Rio+20» كونفەرەنسياسىندا قازۇۋ ءوز الاڭقايىن ۇسىنعان جالعىز ۋنيۆەرسيتەت بولدى. ءبىلىم مەن عىلىمنىڭ تۇراقتى دامۋى بويىنشا يۋنەسكو-نىڭ جەرگىلىكتى حابى مەن بۇۇ جاھاندىق حابىن باسقارۋ مارتەبەسى ءبىزدىڭ ۋنيۆەرسيتەتكە سەنىپ تاپسىرىلعان. بۇگىندە قازۇۋ جىل سايىن ورتالىق جانە وڭتۇستىك ازيا، ەۋروپا مەن اقشش-نان 300-دەن اسا ستۋدەنتتىڭ باسىن قوساتىن «بۇۇ مودەلى - جاڭا جىبەك جولى» حالىقارالىق ستۋدەنتتىك ويىن-كونفەرەنسياسىن ۇيىمداستىرۋ مەن وتكىزۋ جۇمىستارىنا بەلسەندى اتسالىسىپ وتىر.
ن. شيمومۋرا ءوزىن جىلى قارسى العان ءقازۇۋ-نىڭ ۇجىمىنا العىس ءبىلدىرىپ، ۋنيۆەرسيتەتتىڭ تۇراقتى دامۋ بويىنشا كوش باستاپ كەلە جاتقاندىعىن جانە بۇۇ-نىڭ ارتقان ۇلكەن سەنىمىن اتاپ ءوتتى. ونىڭ پىكىرىنشە تۇراقتى دامۋ باستاماسىنا كوبىرەك ادام تارتقان دۇرىس. «ءبىزدىڭ ماقساتىمىز نەعۇرلىم كوپ ادامدى اقپاراتتاندىرۋ ارقىلى تۇراقتى دامۋ يدەياسىن العا جىلجىتۋ. قازۇۋ تاجىريبەسى باسقا كوپتەگەن جوعارى وقۋ ورىندارىنا جاقسى ۇلگى. بۇۇ، كاسىپكەرلەر مەن ۋنيۆەرسيتەتتەر اراسىندا ءۇش جاقتى ارىپتەستىك مودەلىن قۇراستىرۋ كەرەك. ول تۇراقتى دامۋعا اسا قاجەت مەملەكەتتىك-جەكەمەنشىك ديالوگىن نىعايتۋعا ءتيىمدى الاڭقاي ۇسىنادى».
حالىقارالىق قاتىناستار فاكۋلتەتىنىڭ دەكانى كارىمجان شاكىروۆ قازۇۋ-دا 2015 جىلدىڭ 22 قازانىندا بۇۇ وكىلدەرىنىڭ قاتىسۋىمەن ۇيىمنىڭ 70 جىلدىق مەرەيتويىنا وراي «بۇۇ قازىرگى تاڭدا الەمدە الاتىن ورنى مەن تۇراقتى دامۋ ماسەلەلەرى» اتتى عىلىمي-تاجىريبەلىك كونفەرەنسيانىڭ وتكەنىن اتاپ ءوتتى. بۇل شارا UNAI حابى بولىپ ەسەپتەلەتىن ۋنيۆەرسيتەت ۇيىمداستىرعان ءىس-شارالاردى قورىتىندىلايتىن كونفەرەنسيا بولدى.
نوريماس شيمومۋرا ۋنيۆەرسيتەت باسشىلىعى مەن وقىتۋشى-پروفەسسورلىق قۇرامنىڭ جاساعان جۇمىستارى مەن جەتكەن جەتىستىكتەرىن اتاپ ءوتىپ، 2016 جىلدىڭ مامىر ايىندا ءال-فارابي اتىنداعى قازۇۋ ستۋدەنتتەرىمەن كەزدەسۋدى جوسپارلاعانىن ايتتى.
