باقىتگۇل زارقۇمار – 1974-جىلى 15-قىركۇيەكتە موڭعوليانىڭ ۋلاانبااتار قالاسىندا دۇنيەگە كەلگەن. موڭعوليا جاستار وداعىنىڭ التىن مەدالىنىڭ يەگەرى، اقىن. "جۇرەكتەگى جۇزىك" جىر كىتابىنىڭ اۆتورى.

كەرەيدىڭ،
كەربەز قىزىمىن،
تەكتىنىڭ،
تەرمە ءىزىمىن.
التايدىڭ،
ارعى بەتىندە،
قالدىرعان،
قارا ءۇي ۇزىگىن...
تاۋمەنەن،
تامىر جالعاعان،
اسىپ ءبىر،
اققان ارنادان.
كوك اسپان،
كوڭىل كوگىندە،
قاعىپ ءبىر،
قانات سامعاعان.
تاعدىرىن،
تاستاپ اسقاردان،
التايدان،
ارمان باستالعان.
ساقتاردىڭ،
سازىن تىڭداعان،
باعزىلىق،
بال-بال تاستاردان.
جورعالاپ،
جورعا مىنەتىن،
سىرعاسى،
سىلق-سىلق كۇلەتىن.
كەرەيدىڭ،
كەربەز قىزىمىن،
باعاسىن،
بابىن بىلەتىن.
تالايدىڭ،
تاسىن قۇلاتقان،
جاۋىنىڭ،
جاسىن شىلاتقان.
تابانى،
تاڭدا شىق باسىپ،
جانارى،
جانعان شىراقتان.
ءانى بار،
اۋەن ،ىرعاقتى،
توسەنگەن،
تورە سىرماقتى.
كوڭىلى،
كوكتەم،كوزى نۇر،
انادان،
اباق جۇرناق-تى.
ارىنا،
ادال قارايتىن،
بالانى،
باقىت سانايتىن.
جارتىكەش،
جارىق جالعاننىڭ،
جىرتىعىن،
جىرمەن جامايتىن.
كوزدەرى،
كوكتەم كوزىندەي،
سوزدەرى،
سونبەس سەزىمدەي.
تالايى ،
تاعدىر كەشكەن ءبىر،
بولمىسى،
بولات توزىمدەي.
كەرەيدىڭ،
كەربەز قىزىمىن،
تەكتىنىڭ،
تەرمە ءىزىمىن.
التايدىڭ،
ارعى بەتىندە،
قالدىرعان،
قارا ءۇي ۇزىگىن...

      * * *

كوزدەرىمنەن اعىپ ءتۇستى سۇلۋ مۇڭ،
كوپ ەكەن عوي سىرى ءومىر ءسۇرۋدىڭ.

ادالدىعىن الاسارتقان قوعامنىڭ،
الدىندا مەن كەلمەيدى راس تونالعىم!

جاقسىلىعىن ساۋدالاماس پەندەنىڭ،
جانى تازا كەلەرىنە سەنگەمىن.

ادىلەتى جەتپەي تۇرعان عاسىردىڭ،
امىرىنە كەلمەيدى ەش باس ۇرعىم!

جاسىندارى قامشىلاعان عارىشتىڭ،
جانارىنان توگىلەدى بار ۇشقىن.

ەتەگىنە سۇرىنەتىن عايباتتىڭ،
ەزۋدەگى ەرمەگىنە ايعاق كىم؟!

دارالىعىم باعىم الدە سورىم دا،
داڭق پەن اتاق تاپتالادى جولىمدا!

مىنەزدىنىڭ ءمىنى جاقپاس كوپكە شىن،
مىندەتسىنەر توبىر كەيدە وكپەسىن.

كەشىرىمگە كەسىپ بەردىم باسىمدى،
كەۋدەمدەگى تۇنشىقتىرىپ جاسىمدى...
 
          * * *
اينالامدا قارعا-قۇزعىن قارقىلى،
اسپانىمدا جاسىنداردىڭ جارقىلى...
مەن بيىكتەپ كەتتىم ءسىرا، شەكسىزگە،
مەنى تومەن تارتاتىندار ارقىلى...

اينالامدا اق پەن قارا ارپالىس،
اقيقاتتى قاماپ قويعان قالتارىس.
كەشەگى وتكەن مۇقاعالي ورتەنىپ،
كەشكەن مۇڭ عوي، اباي مەنەن التى ارىس.

اينالامدا اڭىز جىرى توبىردىڭ،
اقيقاتتان باسقا مەنىڭ جوق ۇلگىم.
جانىمداعى جارىلىستار كۇشىمەن،
جانتالاسقا ءتۇستىم، جارعا سوعىلدىم.

اينالامدا مايدالاردىڭ مايدانى،
ارتىق كورگەن ايارلىق پەن ايلانى،
مەنى نەگە شاقىرمايسىڭ قاسىڭا،
مەن دەپ سوققان اقىن جۇرەك ايداعى؟!

اينالامدا پيعىلى تار،تۇرقى ءپاس،
ادامدار ءجۇر، ءبىر شەڭبەردە، ءبىر تۇتاس.
مويىنداماس تىرلىگىندە اقىندى،
مويىنداتار مولاداعى قۇلپىتاس...


          * * *
 

تاعدىرىمدى تاستاپ كەتىپ قالار ەم،
تاس ۇيلەردى، تاستاق جولدى قالامەن.
ماعان عانا ارنالعانداي ءبىر ءۇيدىڭ،
ماحابباتىن كوتەرە السا بار الەم؟!

كوتەرە السا،ەركىندىكتى كوك پەن جەر،
كوشىپ سوندا بارسا ءمولدىر كوكتەمدەر.
كۇرەڭىتكەن كۇزدەر قوناق بوپ تۇرسا،
كۇننىڭ نۇرى،ايدىڭ سىرى توككەن زەر.

كەتەر ەدىم،جۇرەگىممەن ءان سالعان،
كەزدەسپەدى،الىستادى قانشا ارمان؟!
تابيعاتتان تاق ورناتقان سول ءۇيدىڭ،
تاڭىن بالكىم، ساعىنىشتار قارسى العان…

جەتەر ەدىم، اڭساپ، شارشاپ، ساعىنىپ،
جەرىگەندەي بار تىرلىكتەن ارىلىپ.
تىنىشتىقتىڭ بەسىگىندە تەربەلگەن،
تىلسىم مەكەن كۇتسە مەنى سارىلىپ…
          
       * * *

جانارىما سيا الماعان جالقىلىق،
جانۇشىرا جارىق ايعا تالپىنىپ…
قاناتتارىن قاعىپ-قاعىپ اسپانداپ،
قايتا ورالسا قاپىلىستا قاشقان ب ا ق…
ماقپال ءتۇننىڭ قۇشاعىندا ماۋجىراپ،
ماحابباتتان تاس بالقىسا، تاۋ جىلاپ…
شىمىلدىقتى ىسىرا الماي دىرىلدەپ،
شىراعىمدى وشىرە الماي كۇبىرلەپ…
تاڭ اتپاسا دەپ تىلەۋمەن تالىقسىپ،
(تاعدىر جازسا تاۋەكەلشىل زار ىستىق…)
ساعىنىشتان سازعا اينالسام دەپ ەدىم،
ساعان ءبىراق، ايتا المايمىن سەبەبىن…
        
             * * *

 

نەلىكتەن ەكەن،
ءبىرتۇرلى جانىم قىسىلدى،
سۇيەتىن بالكىم، ءبىر جاننىڭ بارىن ءتۇسىندى…
ۇنسىزدىكتەردىڭ وزىنەن ۇندەستىك جاساپ،
ماحاببات،
ماعان سەزدىرشى، جالىن كۇشىڭدى؟!

نەلىكتەن ەكەن،
بىلمەدىم، جانارىم تالدى،
تاۋىسا الار ەمەسپىن،شارا مۇڭداردى…
تۇنگى اۋا مەنى شاقىردى اسپانعا قاراي،
قاراڭعى بولمە ىشىندە،
قاعاز بەن قالامىم قالدى…
       
       * * *
جان-جاعىم جالعان دۇنيە، جاساندىلىق،
جانىمدى جىبەردى عوي، قاساڭ قىلىپ...
جابىرقاۋ تىرلىگىمدى جاسىرامىن،
جاناردىڭ جارىعىمەن جاساندىرىپ...

جاقىنىم جارعا يتەردى كەشە مەنى،
جازعىرا الماس پەندە پەشەنەنى.
جاراتقان جاقسىلىقتان ءۇمىتتىمىن،
جاسىمدى ءىشىپ تۇرىپ كەسەدەگى...
    
          * * *
عالامدا مىناۋ عاجابى باسىم،
عاشىقتىق باقىت دەر ەدىم...
ماقامى سىرشىل،نازارى جاسىن،
ماحاببات ساعان سەنەمىن!
جاۋاپسىز قالسا جابىقپا دەر ەم،
جانىڭنىڭ جالقى ءبىر ءانى.
كوگىڭدە مەندىك قالىقتاپ ولەڭ،
كوكشە شىڭ بولسىن تۇراعى.
اڭسارى بولەك،تالعامى بيىك،
ايدىڭ دا بار-اۋ ءبىر مۇڭى؟!
قالماسا دەيمىن ارمانى كۇيىپ،
قامىعىپ جۇرەك بۇلب ۇلى.
عالامدا مىناۋ عاجابى باسىم،
عاشىقتىق باقىت دەر ەدىم.
ماقامى سىرشىل،نازارى جاسىن،
ماحاببات ساعان سەنەمىن!!!
      

        * * *
كوفە ءىشىپ وتىرمىن وڭاشادا،
كوفتامداعى گۇلدەرگە جان ءبىتىرىپ.
قانشا ۋاقىت جاستىقتى توناسا دا،
قارسى الارمىن تاعى دا تاڭدى كۇلىپ.
كوفە ءىشىپ وتىرمىن ويىم دارا،
كوفتامداعى گۇلدەردەن كورىندى مۇڭ.
و،جۇرەگىم...ۋاقىتتى مويىنداما،
ويناعىسى كەلسە دە ءولىم بۇگىن.
كوفە ءىشىپ وتىرمىن وڭاشا تىم،
كوفتامداعى گۇلدەر دە سىرعا بوككەن.
ماحابباتقا مازداعان جول اشاتىن،
ماعان ءومىر ءبىر ءانىن قۇربان ەتكەن.
كوفە ءىشىپ وتىرمىن قۇشىپ ارمان،
كوفتامداعى گۇل بىتكەن اشىلدى ءبىر.
سەنى قاشان پەندەلەر تۇسىنە العان،
سەزىمدەرى سەمبەيتىن اسىل عۇمىر؟!