"نۇر وتان" پارتياسى اتىنان ءماجىلىس دەپۋتاتتىعىنا 127 ۇمىتكەر تىركەلەدى، - دەپ حابارلايدى "قامشى" پورتالى پارتيانىڭ باسپا ءسوز قىزمەتىنە سىلتەمە جاساپ.

"ق ر پارلامەنتى ءماجىلىسىنىڭ دەپۋتاتتىعىنا ۇمىتكەرلەردىڭ پارتيالىق تىزىمىنە 127 ادام ەنىپ وتىر. ولاردىڭ قاتارىندا رەسپۋبليكاعا بەلگىلى ساياساتكەرلەر، قوعام قايراتكەرلەرى، سپورتشىلار مەن ونەر يەلەرى بار"، - دەلىنگەن پارتيانىڭ كەزەكتەن تىس 17ء-شى سەزى بارىسىندا تاراتىلعان اقپاراتتا. 

ايتا كەتەيىك، القالى جيىنعا 2 مىڭنان اسا دەلەگات قاتىسۋدا. ولاردىڭ قاتارىندا رەسپۋبليكانىڭ بارلىق وڭىرلەرىندەگى كونفەرەنسيالاردا سايلانعان دەلەگاتتار، مەملەكەتتىك باسقارۋ ورگاندارىنىڭ، ۇلتتىق حولدينگتەردىڭ، ءبىلىم، عىلىم، مادەنيەت جانە سپورت قايراتكەرلەرى، قوعام، ديپلوماتيالىق كورپۋس، ۇكىمەتتىك ەمەس جانە جاستار ۇيىمدارىنىڭ، بۇقارالىق اقپارات قۇرالدارىنىڭ، باستاۋىش پارتيا ۇيىمدارىنىڭ وكىلدەرى بار.

سەزدە «نۇر وتان» پارتياسىنىڭ جاڭا سايلاۋالدى باعدارلاماسى قابىلداناتىن بولادى. سونداي-اق  ق ر پارلامەنتى ءماجىلىسى دەپۋتاتتارىن سايلاۋعا قاتىستى پارتيالىق ءتىزىم بەكىتىلمەك. باعدارلاما جوباسى الداعى بەسجىلدىق كەزەڭ بويىنشا 2021 جىلعا دەيىنگى پارتيانىڭ نەگىزگى باعىتىن ايقىندايدى. ول بويىنشا «100 ناقتى قادام» ۇلت جوسپارىن جۇزەگە اسىرۋ شارالارى قامتاماسىز ەتىلەدى. بۇدان بولەك، پارتيا باعدارلاماسىندا «قازاقستان 2050» ستراتەگياسى، «نۇرلى جول» باعدارلامالارىن جۇزەگە اسىرۋدىڭ ناقتى تەتىكتەرى دە قاراستىرىلادى.