ۇلتارالىق ارازدىقتى ناسيحاتتادى دەگەن ايىپپەن ەكى جىلعا باس بوستاندىعىنان ايىرىلعان بەلگىلى ساياساتكەر، ۇلتشىل پاتريوت سەرىكجان مامبەتالين Facebook الەۋەتتىك جەلىسىندە وزىنە تاعىلعان ايىپتى – باس بوستاندىعىنان ايىرۋ جازاسىن جۇمسارتۋدى سۇراعان حاتى جاريالاندى. حات يەسى وقىرمانداردان قولداۋ كۇتەتىندىگىن مالىمدەدى، - دەپ حابارلايدى "قامشى" پورتالى.

«قىمباتتى دوستار جانە مەنىڭ تاعدىرىما الاڭداۋشىلىق تانىتقان ارىپتەستەر! وزدەرىڭىز بىلەتىندەي، جۋىردا عانا مەنى «ۇلتارالىق ارازدىقتى» ناسيحاتتادى دەگەن ايىپپەن سوت وتىرىسى ءوتىپ، سۋديا 2 جىل باس بوستاندىعىمنان ايىرۋ تۋرالى شەشىم قابىلداندى. مەن تۇزەۋ مەكەمەسىندە وتىرعان ساتتەرىمدە كوپ ويلانىپ، ءوز ىس-ارەكەتىمدى تەرەڭ تارازىلاۋدان وكىزىپ، كوپتەگەن قاتەلىكتەرگە ۇرىنعاندىعىمدى ۇقتىم. ونىڭ كوپتەگەن ايعاق، دالەلدەرى دە جەتكىلىكتى. سوندىقتان دا ماعان تاعىلعان ايىپتار مەن قاتە-كەمشىلىكتەرىمدى تولىق مويىندايمىن. قازاق حالقىن ۇلت رەتىندە كەمسىتەتىن تەرىس باعىتتاعى كىتاپتان ءۇزىندىنى الەۋمەتتىك جەلىدەگى پاراقشامدا جازىپ، جاريالاعانىمدى دا جوققا شىعارا المايمىن. مۇنداي ارەكەت جاساپ جاتقان ساتىمدە، مەن ونىڭ سوڭى وسىنداي جاعدايعا اكەپ سوقتىراتىندىعىن تولىق تۇسىنبەدىم. مەن ونى ارانداتۋ ماقساتىمەن جاساماسام دا، ءوز قاتەلىگىمدى تولىق مويىندايمىن. مەنىڭ بيزنەسپەن اينالىسىپ، ءبىرشاما ۋاقىت شەتەلدە تۇرعانىمدى كوپتەگەن ادامدار بىلەدى دەپ ويلايمىن. ءبىراز جىلدار ەلىمىزدەگى قوعامدىق-ساياسي جيىندارعا بەلسەندى قاتىسىپ، ەلىمىزدەگى جاعدايدى ودان سايىن جاقسارتۋعا تىرىسقانىمنان دا حاباردار بولسا كەرەك. جەكە وتباسىلىق ومىرىمدە دە سوڭعى جىلدارى ەلەۋلى وزگەرىستەر ورىن الدى. الماتى قالاسىندا قىركۇيەكتە ۇلىم دۇنيەگە كەلدى. مەن ۇلىمنىڭ وسى ولكەنىڭ تۋماسى، بەل بالاسى بولىپ ءوسىپ، قازاقستاننىڭ تەڭ قۇقىلى ازاماتى رەتىندە ەرجەتكەنىن قالايمىن. اتا-انام دا وسى ەلدە تۇرىپ، ءوز وتاندارى الدىندا كوپ ەڭبەك ەتتى. انام – ەلىمىزدىڭ ەڭبەك سىڭىرگەن اكۋشەر-گينەكولوگى رەتىندە كوپ جىلدار بويى ۇلتتىق مەديسينا اكادەمياسىندا ۇستازدىق ەتىپ، بىلىكتى ماماندار دايارلاپ شىقتى. اكەم دە اق حالاتتى ابزال جان رەتىندە ەل ازاماتتارىنىڭ دەنساۋلىعىن تۇزەۋگە اتسالىستى. 
سوندىقتان مەن راسىمەن دە قاتەلەستىم جانە ءوز قاتەمدى تولىعىمەن ءتۇسىندىم، ءبىراق بۇل قىلمىستى ادەيى جاساعان جوقپىن. مەنى دۇرىس تۇسىنۋلەرىڭىزدى سۇرايمىن» دەگەن س. مامبەتالين ءوزىنىڭ جازباسىندا.

ەستەرىڭىزگە سالساق، بۇعان دەيىن دە "الاۋىزدىق تۋعىزدى" دەگەن ايىپپەن ءىستى بولعان قوعامدىق بەلسەندى بولاتبەك ءبىلالوۆ تە قاتەلىگىن مويىنداپ، سوتتا كەشىرىم سۇراعان بولاتىن. سوت وعان ءۇش جىلعا باس بوستاندىعىن شەكتەۋ جازاسىن بەلگىلەپ، سوت زالىندا بوساتقان ەدى.