بانكتەردىڭ بانكروتتىعى تۋرالى ارانداتۋشىلىق حابارلاما تاراتقانى ءۇشىن 20 تاۋلىككە قاماۋعا الىنعان دارحان سابدەنوۆتىڭ Kaspi bank-كە قارىزى بار بولىپ شىقتى. بۇل تۋرالى الماتى قالاسى بوستاندىق اۋداندىق سوتىنىڭ انىقتاۋى كەزىندە بەلگىلى بولدى، دەپ حابارلايدى Tengrinews.kz ءتىلشىسى.

ءىس ماتەريالدارى بويىنشا، Kaspi bank دارحان سابدەنوۆتىڭ بارلىق جىلجىمالى جانە جىلجىمايتىن دۇنيە مۇلكىنە تىيىم سالۋ تۋرالى وتىنىشپەن شىققان. سوت بۇل ءوتىنىش حاتتى قاناعاتتاندىرىپ، ونىڭ 2 ميلليون تەڭگە بولاتىن دۇنيە-مۇلكىن تۇتقىنعا العان.

"بۇل ۇيعارىمدى اقتارۋ الماتى سوت اكتىلەرىن ورىنداۋ دەپارتامەنتىنە جۇكتەلسىن. بۇل ۇيعارىم دەرەۋ ورىندالۋى ءتيىس"، - دەپ ۇيعارىمنىڭ ماتىنىندە جازىلعان.

Kaspi bank ونىڭ قالاي قارىزدانعانىن ءتۇسىندىردى. Kaspi bankء-تىڭ اتقارۋشى ديرەكتورى سابىرجان بەركىنبايەۆتىڭ ايتۋىنشا، بانك شىن مانىندە سابدەنوۆكە بانكتىك زاەمنىڭ كەلىسىم شارتى بويىنشا بورىشتى ءوندىرىپ الۋ تۋرالى تالاپ قويعان. ويتكەنى ول بانكتەن نەسيە العان.

"جاۋاپكەر العان نەسيەسىن تولەۋدەن تايقىپ، جىلىستاپ جۇرگەن. تولەۋ مەرزىمىن 270-تەن اسا كۇن وتكىزىپ العان. ءوزىنىڭ مىندەتتەمەلەرىن ۇزاق ۋاقىتقا ورىنداماعانى ءۇشىن ستاندارتتى ءتارتىپ شەڭبەرىندە بورىشتى ءوندىرىپ الۋ، اقى تالاپ ەتۋ جۇزەگە اسىرىلعان"،- دەيدى ول.

سەنتركرەديت بانكىنىڭ 30 جاستاعى ەكس-قىزمەتكەرى دارحان سابدەنوۆتىڭ قاۋەسەت تاراتقان ايىبى اشىلدى. وعان قاتىستى "الداۋ جانە سەنىمدى اقتاماۋ سالدارىنان بىرەۋدىڭ مۇلكىنە زيان كەلتىرۋ" بابى بويىنشا اكىمشىلىك ءىس قوزعالدى جانە 20 كۇنگە قاماۋعا الىندى. ءوز كەزەگىندە، زارداپ شەككەن بانكتەر ىسكەرلىك ابىرويلارىنا نۇقسان كەلتىرگەنى ءۇشىن سابدەنوۆتەن كەلتىرىلگەن زالالدى ءوندىرىپ الۋ نيەتى بار ەكەندىكتەرىن حابارلادى.