قازاقستاندىق ءانشى قايرات نۇرتاستىڭ رەسەي فەدەراسياسىنىڭ ومبى قالاسىندا وتكىزگەن كونسەرتى جەرگىلىكتى بۇقارالىق اقپارات قۇرالدارىنىڭ تاقىرىبىنا اينالعان. بۇل تۋرالى baq.kz حابارلاپ وتىر.

 ومبى قالاسىنىڭ بۇقارالىق اقپارات قۇرالدارى قازاقستاندىق ءانشى قايرات نۇرتاستىڭ كونسەرتىنىڭ انشلاگپەن وتكەنىن ەرەكشە تاڭدانىسپەن جازدى. جەرگىلىكتى باق-تىڭ جازۋىنا قاراعاندا، قايرات نۇرتاستىڭ كونسەرتى وتەتىن كۇنى ومبى ورتالىق سيرك عيماراتىنا كورەرمەندەر سىيماعان. بيلەتتەر الدىن الا ساتىلىپ كەتكەنىنە قاراماستان سيرك عيماراتىنىڭ الدىنا حالىق كوپ جينالىپتى. بيلەت ساتىپ الۋعا ۇلگەرمەگەن حالىق كونسەرتتى عيماراتتىڭ جاقتاۋلارىنداعى بالكونداردان تىك تۇرىپ تاماشالاعان. كونسەرتكە جەرگىلىكتى قازاق ۇلتىنىڭ وكىلدەرىمەن قاتار وزگە ۇلتتىڭ وكىلدەرى دە كەلگەن. ولار وزدەرىن قايرات نۇرتاستى ءسۇيىپ تىڭدايتىندىقتارىن ايتىپ، ونىڭ ونەرىن جوعارى باعالايمىز دەپ جەرگىلىكتى باق-قا سۇحباتتار بەرگەن.

قايرات نۇرتاستىڭ ءوزى بولسا جەرگىلىكتى باق-عا بەرگەن سۇحباتىندا: «بۇل مەنىڭ ومبى قالاسىندا العاش رەت ونەر كورسەتۋىم. وكىنىشكە وراي، مەنىڭ جوسپارلارىم وتە تىعىز. الىستاعى اعايىنعا كەلۋگە تىرىسسام دا جۇمىس جوسپارلارىم وعان مۇمكىندىك بەرە بەرمەيدى. بۇل قالادا ونەر كورسەتۋ ماعان ارمان بولاتىن. سەبەبى، ومبى بۇل قازاقتىڭ قالاسى، قازاقتىڭ جەرى. الداعى ۋاقىتتا وسىنداعى اعايىن ءۇشىن ۇنەمى كەلىپ تۇرۋعا تىرىسامىن»، — دەپ ويىن بولىسكەن.

كونسەرت لازەرلىك شوۋعا جالعاسىپ، كونسەرتتىڭ سوڭىندا ءانشىنىڭ اناسى، پروديۋسسەرى گۇلزيرا ايداربەكوۆا ومبى تۇرعىندارىنا ءوزىنىڭ العىسىن بىلدىرگەن. كوسەرت سوڭىندا قايرات نۇرتاس: «الداعى ۋاقىتتا ومبى قازاقتارىن ءوزىمنىڭ جاڭا اندەرىممەن جانە جاڭادان تۇسكەن فيلمدەرىممەن قۋانتا الامىن. جاقىندا مەنىڭ قاتىسۋىممەن جاڭا فيلم تۇسىرىلەدى. فيلم مەنىڭ ءومىرىم تۋرالى بولادى»، — دەپ كورەرمەندەرىن قۋانتقان.

ءبىر قىزىعى، رەسەي جەرىندە وتكەن كونسەرت تەك قازاق تىلىندە وتكەن. ب ا ق وكىلدەرى كونسەرتتىڭ قازاق تىلىندە وتۋىنە قاتىستى «قازاق تىلىندە وتكەن كونسەرتكە ەشقانداي رەنىشتەر بولعان جوق. كورەرمەندەردىڭ كوبى قازاق ءتىلىن تۇسىنبەسە دە قازاق انشىسىنە دەگەن قۇرمەتىن كورسەتىپ، ءانشىنىڭ قازاق تىلىندەگى ايتقان اندەرى مەن لەبىزدەرىن جىلى قابىلدادى» دەپ جازادى.

ۆاحيت نيازوۆ،

نۇرسەرىك جولبارىس، جاننا سادىقوۆا (فوتو).

 استانا — ومبى