سوماليدەگى بورتىندا جارىلىس بولعان ۇشاقتا قازاقستاندىق ەكى ازاماتتىڭ بولعانى انىقتالدى، - دەپ حابارلايدى «قامشى» پورتالى Tengrinews.kz – كە سىلتەمە جاساپ.

ايتا كەتەيىك، 2 اقپاندا سومالي استاناسى موگاديشو اۋەجايىنان كوتەرىلە بەرگەندە A321 ۇشاعىنىڭ بورتىندا جارىلىس بولعان ەدى. جولاۋشىلاردىڭ ءبىرى ۇشاقتىڭ فيۋزەلياجداعى ويىقپەن ۇشىپ بارا جاتقان ءساتىن ۆيدەوعا ءتۇسىرىپ العان بولاتىن. وقيعانىڭ سالدارىنان ەكى ادامنىڭ زارداپ شەككەنى بەلگىلى بولدى.

سايت ءتىلشىسى ۇشاق بورتىندا قازاقستاننىڭ ەكى ازاماتىنىڭ بولعانىن انىقتادى. ولار الماتىداعى №405 اۆياجوندەۋ زاۋىتىنىڭ قىزمەتكەرلەرى - سەرگەي سيەۆەرين مەن نيكولاي بوچكاريەۆ. وسى زاۋىتتىڭ ديرەكتورى كونستانتين ۋشاكوۆ بۇل اقپاراتتى راستادى. ونىڭ ايتۋىنشا، قازاقستاندىقتار سوماليگە بۇۇ تاپسىرماسى بويىنشا جۇمىس ىستەيتىن تىكۇشاقتى جوندەۋگە بارعان.

"ءبىزدىڭ قىزمەتكەرلەر جۇمىس بابىمەن وندا ءجيى ۇشادى. بۇل جولى دا ولار جۇمىس بابىمەن سوندا بارىپ، الماتىعا قايتىپ كەلە جاتقان بولاتىن. ولار زارداپ شەككەن جوق. وقيعادان كەيىن بىردەن بايلانىسقا شىقتى. ۇشاقتىڭ اپاتتى جاعدايدا قونعانىن ايتتى. ناقتى نە بولعانى بەلگىسىز. ءقازىر ماماندار تەرگەۋ جۇرگىزىپ جاتىر"، - دەدى ۋشاكوۆ.

ونىڭ ايتۋىنشا، اپاتتى قونۋدان كەيىن قازاقستاندىقتار بۇۇ بازاسىنا قايتادان بارىپ، قايتادان جۇمىس ىستەگەن. "وندا بۇۇ قىزمەتكەرلەرى تۇرادى. سوندىقتان دا ءبىزدىڭ قىزمەتكەرلەر قاۋىپسىزدىكتە. ولارمەن ۇنەمى بايلانىستامىز"، - دەدى ول.

ءقازىر قازاقستاندىقتار تەرگەۋ ىسىنە قاتىستى شارالاردىڭ اياقتالعانىن كۇتىپ جاتىر. "ءقازىر ول جاقتا تەكسەرىستەر ءجۇرىپ جاتىر. بۇل تەراكت بولدى دەگەن بولجام بار. تەرگەۋ اياقتالعان بويدا ولار وسىندا ۇشىپ كەلەدى. تۋىستارىنا حابار بەرەمىز، جاعدايدى باقىلاپ وتىرمىز"، - دەدى ۋشاكوۆ.