«ازىرەت سۇلتان» قورىق-مۇراجايىندا قازاق عىلىمىنىڭ كورنەكتى وكىلى قايىم مۇحامەدحانوۆتىڭ 100 جىلدىعىنا وراي «سەگىز قىرلى ءبىر سىرلى» اتتى كورمە ۇيىمداستىرىلدى، - دەپ حابارلايدى «قامشى» پورتالى.

عالىم، بىلىكتى ۇستاز، اقىن، جازۋشى، دراماتۋرگ، ادەبي اۋدارماشى، عۇمىرىن اباي مۇراسىن زەرتتەۋگە ارناعان، شاكارىمتانۋدىڭ نەگىزىن قالاۋشى، قازاق كسر گيمنىنىڭ اۆتورى، كسرو جازۋشىلار وداعىنىڭ مۇشەسى، قازاقستاننىڭ مەملەكەتتىك سىيلىعىنىڭ، جازۋشىلار وداعى سىيلىعىنىڭ، حالىقارالىق «الاش» ادەبي سىيلىعىنىڭ جانە حالىقارالىق اباي اكادەمياسىنىڭ (لوندون) التىن مەدالىنىڭ يەگەرى، پروفەسسور، كسرو جانە قازاقستان حالىق اعارتۋ ءىسىنىڭ ۇزدىگى،  قايىم  مۇحامەدحانوۆتىڭ تۋعانىنا 100 جىل تولىپ وتىر. وسىعان وراي، «ازىرەت سۇلتان» قورىق-مۇراجايى قوجا احمەت ياساۋي كەسەنەسىندە «سەگىز قىرلى ءبىر سىرلى» كورمەسىنىڭ تۇساۋىن كەستى.  كورمەنىڭ العاشقى تىلەگىن «ازىرەت سۇلتان» قورىق-مۇراجايى ديرەكتورى اۋباكىر جاندوس ماعازبەك ۇلى  اشىپ، قوعام قايراتكەرى قايىم مۇحامەدحانوۆتىڭ قازاق عىلىمىنا قوسقان سۇبەلى ۇلەسىنە توقتالىپ، كورمەنىڭ ءبىر اي كەلۋشىلەرگە قىزمەت كورسەتىندىگىن اتاپ ءوتتى. قوجا احمەت ياساۋي اتىنداعى ءحقتۋ-نىڭ وقىتۋشىسى عالىم ساپاربەك ەرگوبەك قايىم مۇحامەدحانوۆتىڭ ۇلى اقىن اباي الەمىن زەرتتەۋدەگى جانقيارلىق ەڭبەگىنە ايرىقشا توقتالدى.

كورمەنى تاماشالاۋعا بۇقارالىق اقپارات قۇرالدارى، قالامىزداعى ەتنوپەداگوگيكالىق كوللەدجدىڭ ستۋدەنتتەرى مەن وقىتۋشىلارى جانە №1 احمەت بايتۇرسىنوۆ اتىنداعى قازاق ورتا مەكتەبىنىڭ وقۋشىلارى قاتىسىپ، تاعىلىمى مول شارادان اسەرلەنىپ تارقاستى.