الماتىداعى الاتاۋ اۋدانىنا قاراستى 151 مەكتەپتىڭ وقۋشىلارى قازاق ءتىلى ءمۇعالىمىنىڭ جازالاۋ ادىستەرىنە ابدەن ۇيرەنگەن. جاس مامان سىنىپتى ىشىنەن كىلتتەپ، ءۇي تاپسىرماسىن ورىنداماعان وقۋشىلارعا ءتۇرلى جازا قولدانادى ەكەن. وتكەن اپتادا 7 «گ» سىنىبىنىڭ وقۋشىلارى ءمۇعالىمنىڭ كەزەكتى ارەكەتىن تەلەفونعا ءتۇسىرىپ العان، - دەپ حابارلايدى «stan.kz».

وقۋشىلار جاعدايدى تەلەفونعا ءتۇسىرىپ، اتا-انالارىنا كورسەتپەكشى بولعان. سەبەبى، ولار ءتۇرلى جايلارعا بايلانىستى كەز كەلگەنىمىز وسىلاي جازالانۋىمىز مۇمكىن دەپ قورقادى. اتا-انالاردىڭ باستاماسىمەن مەكتەپ ديرەكتورى اسحات وشاقبايەۆتىڭ الدىندا جينالىس تا ۇيىمداستىرماقشى بولعان.

بۇل ۆيدەودا 7 سىنىپتىڭ وقۋشىسى ءۇي تاپسىرماسىن ورىنداماعانى ءۇشىن جازالانىپ جاتىر. ونىڭ بۇلاي تۇرعانىن سىنىپتاستارى ۆيدەوعا ءتۇسىرىپ العان. ورىندىق كوتەرىپ تۇرعان وقۋشى ءاتى-جونىن ايتىپ ءمۇعالىمنىڭ ۇستىنەن شاعىمدانعىسى كەلمەيدى. سەبەبى، جۇرتتىڭ كوزىنە جامان قىلىعىمەن كورىنۋدى نامىس كورەدى.

ال سايتىمىزعا ماعلۇماتتى بەرگەن كىسى ءوزىنىڭ ەسىمىن اتاماۋدى ءوتىندى.

«وركەنيەتتى زاماندا بالالاردى بىلىمگە باۋلۋدىڭ وزگە جولىن ۇستانباساق، وسى مۇعالىمگە 151 مەكتەپتە شەكتەۋ قوياتىن كىسى بولماي تۇر»، - دەيدى ەسىمىن اتاماۋدى وتىنگەن قالا تۇرعىنى.

ەستە بولسا، ءبىر جىل بۇرىن تۋرا وسى مەكتەپتىڭ مۇعالىمدەرى ءبىرىن-بىرى بالاعاتتاپ ءىس اكىمشىلىك سوتقا دەيىن جەتكەن ەدى. سوڭىندا ارىپتەسىنىڭ نامىسىنا تيگەن ۇستازعا ايىپپۇل سالىنعان.