بۇگىن - قازاق پوەزياسىنىڭ اقيىق اقىنى مۇقاعالي ماقاتايەۆتىڭ تۋعان كۇنى. جيىرماسىنشى عاسىردىڭ وزىق اقىندارىنىڭ ءبىرى بولعان مۇقاعالي تۋعان حالقىنا وشپەس مۇرا، سارقىلماس قازىنا قالدىردى.

«بۇگىن مەنىڭ تۋعان كۇنىم، وي، ءپالى-اي!» دەپ جىرلاعان اقىن 1931 جىلى الماتى وبلىسىنىڭ نارىنقول اۋدانىنداعى شالكودە اۋىلىندا تۋعان.

مۇقاعاليدىڭ اۋىلدان باستالعان ەڭبەك جولى، الماتىدا جالعاسادى.  باستاپقىدا جەتىجىلدىق مەكتەپتىڭ ءمۇعالىمى بولادى. سودان نارىنقول اۋداندىق «سوۆەتتىك شەكارا» گازەتىندە ىستەيدى. ءار جىلدارى «سوسياليستىك قازاقستان» (قازىرگى «ەگەمەن قازاقستان») گازەتىندە (1962-1963)، «مادەنيەت جانە تۇرمىس» (قازىرگى «پاراسات») 1963-1965، «جۇلدىز» (1965-1972) جۇرنالدارىنىڭ رەداكسياسىندا، قازاقستان جازۋشىلار وداعىندا (1972-1973) قىزمەت اتقاردى.

اقىننىڭ «يليچ»، «ارمىسىڭدار دوستار»، «قارلىعاشىم، كەلدىڭ بە؟»، «ماۆر»، «اققۋلار ۇيىقتاعاندا»، «شۋاعىم مەنىڭ»، «ءومىرداستان» اتتى جىر جيناقتارى كوزىنىڭ تىرىسىندە جاريالانعان. دۇنيەدەن وزعان سوڭ دا، اقىننىڭ «سوعادى جۇرەك» جانە باسقا كوپتەگەن كىتاپتارى جارىق كوردى.

اقىن فاريزا وڭعارسىنوۆانىڭ ايتۋىنشا، «قارلىعاشىم، كەلدىڭ بە؟» جىر جيناعى شىققاننان باستاپ مۇقاعالي حالىقتىڭ جۇرەگىنەن ورىن الدى. «مەن مۇقاعاليدى ءتول ادەبيەتىمىزدەگى اباي، ماحامبەت سياقتى ۇلى تۇلعالاردىڭ قاتارىنان كورەمىن. ونىڭ اسقاق پوەزياسىنان ۇلتىمىزدىڭ بارلىق ءبولمىس-بىتىمىن، ارمان-مۇراتىن ايقىن بايقايمىز»، - دەيدى اقىن فاريزا.

مۇقاعالي 1976 جىلى قايتىس بولدى، الماتى قالاسىنداعى كەڭساي زيراتىنا جەرلەنگەن.

قارا ولەڭدى ءقادىر تۇتاتىن حالقى باردا، اقىننىڭ ادۋىندى دا سىرشىل پوەزياسى ماڭگى جاساي بەرەتىنى انىق.