Májiliste Palata Spıkeri Nurlan Nyǵmatýlınniń tóraǵalyǵymen ótken jalpy otyrysta depýtat Qojahan Jabaǵıev Qazaqstan Respýblıkasynyń Premer-Mınıstri Serik Ahmetovke depýtattyq saýal joldady.
«Ústimizdegi jyly qazaqtyń halyq kompozıtory, dala sırkiniń negizin qalaýshy, ulttyq at sportynyń túrli tásilin jańǵyrtýshy ónerpaz, jaýyryny jerge tımegen alyp kúsh atasynyń ıesi Balýan Sholaq (shyn aty Nurmaǵambet) Baımyrzaulynyń dúnıege kelgenine – 150 jyl.
Balýan Sholaq – zamanynda qazaq án óneriniń tamasha oryndaýshysy, nasıhatshysy bola júrip, ózi de án shyǵaryp, qazaqtyń ánshilik ónerin órkendetýge úlken úles qosqan kompozıtor. Balýan Sholaqtyń jıyrmaǵa jýyq áni bolǵanymen, búgingi kúnde olardyń halyq arasynda nasıhattalýy tómen. Aqyndyq qyry múlde zertelmegen.
Tipti, Balýan Sholaqtyń ómirbaıany jóninde de zertteýler áli kúnge naqtylanbaǵan. Qazaq rýhanıaty ǵana emes, mádenıetiniń de qalyptasýynda zor orny bar tulǵanyń dúnıege kelgen jeri men qaıtys bolǵan jylyna qatysty ártúrli derekterdi aıtyp júrmiz.
Sondaı-aq, Balýan babamyzdyń óz ulty úshin jasaǵan kúreskerlik qaıratkerligin qazirgi urpaqtyń bile bermeıtini qynjyltady. Óıtkeni, Balýan Sholaqtyń ult-azattyq kóterilisindegi orny da anyqtalmaǵan. Ol týraly ultymyzdyń kórnekti jazýshysy Sábıt Muqanovtyń «Balýan Sholaq» povesinde jáne belgili jazýshy, dramatýrg Dýlat Isabekovtiń "Jaýjúrek" atty týyndysynda aıtylǵanymen, muny jetkiliksiz dep esepteımiz. Sondyqtan, áli de ashylmaǵan qyrlary kóp dańqty balýan, ánshi, aqyn, halyq kompozıtory Balýan Sholaqtyń 150 jyldyǵynda osy olqylyqtardyń orny túgel tolyqtyrylady degen úmitimiz bar. Ult tarıhy úshin qymbat ári qaıtalanbas iri tulǵa Balýan Sholaqtyń ómirbaıanyn, shyǵarmashylyǵyn tolyq zerttep, laıyqty baǵasyn berý – Elbasynyń halyqqa arnaǵan Joldaýynda kórsetilgen jańa qazaqstandyq patrıotızmdi qalyptastyrý men damytýda úlken ról atqaratyny sózsiz.
Qurmetti Serik Nyǵmetuly!
Úkimettiń 1999 jylǵy 28 qyrkúıektegi «Mereıtoılar men ataýly kúnderdi merekelý týraly» qaýlysyna sáıkes Balýan Sholaq (Nurmaǵambet) Baımyrzaulynyń 150 jyldyǵyna oraı tómendegi is-sharalardyń oryndalýyna yqpal etýińizdi suraımyz.
- Almaty qalasyndaǵy Balýan Sholaq sport jáne mádenıet saraıynyń aldyna Balýan Sholaqtyń eskertkishin ornatý.
- Aqmola men Jambyl oblystarynda Balýan Sholaqtyń mereıtoıyna oraı is-sharalar ótkizý.
- Astana nemese Almaty qalalarynda Balýan Sholaqtyń ómiri men shyǵarmashylyǵyna arnalǵan ǵylymı-tájirıbelik konferensıa uıymdastyrý.
- Qaıratker tulǵa týraly kórkem jáne derekti fılm túsirip, respýblıkalyq telearnalardan berý.
Kóterilgen máselege belgilengen tártippen jazbasha jaýap berýizdi suraımyz.
26.02.2014
Pikir qaldyrý