Jaýyp qoıyp aqyldy, Kórgen jerden jaqynyńa balap aldyń jat uldy. Qyldan názik qylyqtaryń qytyǵymdy keltirip, Sary altyndaı sabyrymdy sary qymyzdaı sapyrdy.   Sen dep bildim sulýlyqtyń sulýy da, kórkemdiktiń kórkemi, Sol kórkemdik kóńilimdi jalyn ot bop órtedi. Aınalamnyń bári kileń túsiniksiz jumbaq bolǵan bul kúnde, Seniń únsiz jymyń etip qalǵanyń da aqtaryp syr shertedi.   Eske salyp erke totaı erkindikke toly meniń kezimdi, Syrtqa shashpas syr jarattyń syrǵalym – aý eń izgi. Jas sábıdiń kórgen túsi tárizdi pák tazalyq, Jaýlap aldy, baýrap aldy sergeldenge kóp salynǵan sezimdi.   Asyl arý aıamadyń az kún baqyt syıladyń. Dámdilikti, án qylyqty qyzyqtadym: jurtqa tastap attanýǵa qımadym. Amal bar ma ósken burym sekildenip jelkildegen qyzyǵym, Kesken burym sekildendip qysqa bolyp qınadyń.   Baǵa jetpes asylyńdy urlaı bergim, urlaı bergim keledi, Móldiregen muńly kózdi tynbaı kórgim,   tynbaı kórgim   keledi. Aǵalaǵan erke sylqym daýysyńdy tyńdaı bergim, tyńdaı bergim keledi, Seter taldaı seni ǵana jyrlaı bergim, jyrlaı bergim keledi.   Jolyǵam dep oıladym ba mundaı kúıge óńimde ne túsimde, Oıda joqta kez bop qaldyń jazylmastaı jara qaldy ishimde. Ómir boıy ón boıymnyń duǵasy etip ótermin, Órt tımegen jan-tánińdi usynǵanyń úshin de.    

  Jan tánime jaıdary nur bereıin, Búrleneıin, sábı pák kúıge eneıin. Kelip ketshi kerilgen kerbez erkem, Kirpigińdi, kózińdi bir kóreıin.   Kezigeıik kel qalqam Kóldaraǵa, Erkeleıik erkindep en dalada. Syńǵyr – syńǵyr kúlkińdi bir estisem, Saǵynyshtan keýdemde sher qala ma.   Shomylaıyq júzeıik Aqqýkólde, Orqoıandaı oınaıyq gákký-belde. Erinińnen elsizde bal syılashy, Gúl-báısheshek masaırap tatsyn jel de.   Ońashada sybyrlap qaýyshaıyq, Almasaıyq ystyq dem aýysaıyq. Belbeýińdi bosatshy maǵan arnap, Armandardy tunshyqqan taýysaıyq.   Sezinip erkin júrek lúpilińdi, Jýaıyn sút sáýleńe tún-túrimdi. Barady lastanyp kóńil – kólim, Bir kórset kúnásiz kóz, kirpigińdi.  

  Muńaıdy jalǵan muńaıdym, Muńyn da bildim Kún Aıdyń. Sen biraq janym kúrsinbe, Muń shekpe menshe shyraılym.   Baqyttyń baryn umytyp, Muń, sherdiń ıtin ulytyp, Muńdana berem muńdana, Muńly kúnderden kún utyp. Adamdar uqpaı muny túk, Sen ǵana júrsiń jylytyp.   Madaqtap, maqtap myń dana, Júrse de ósip qun baǵa, Aldanyp qalyp shyrǵaǵa, Muńdana berem muńdana. Muń zarǵa toly álemde, Baqytym sensiń bir ǵana.   Bólispeı bireý nalamnan, Bólisip júrse baǵamnan. Bireýler alyp jaǵamnan, Jarasym tapsa nadannan. Ókine kórme janym sen, Túńilip Alla, Adamnan. Adamdar degen qashanda, Aramdyqtardan jaralǵan.   Muńdanam daǵy jylaımyn, Jylaımyn daǵy shydaımyn. Minezin uqpaı Kún, Aıdyń, Jarlyǵyn kútem Qudaıdyń. Muń bergen myna jalǵanda Sen aman júrshi shyraılam  

  Ee Búbi, esil Búbi, erke Búbi, Kesh bildik eken ómir kelte Búbi. Móldirep sen kózime qaraǵanda: Deýshi edim: «Et júrekti órte Búbi»   Birge ósken asyl qurbym bala kúnnen, Taǵýshy em moınyńa alqa ala gúlden. Kettiń ǵoı basqa jannyń baqyty bop, Jan ediń ishke mazdaq jaǵa bilgen.   Aqqýym arman kólde terbetilgen, Sheker bal tamyzýshy em men de tilden. Jol shegip, jotany asyp barǵanymda, Turatyn nur tógilip kelbetińnen.   Erke ediń Elik, Maral laǵyndaı, Tynbaıtyn seni kórsem jyr aǵylmaı. Ernińnen ásem kúlki syrǵýshy edi, Marjan ǵyp jipke tizgen laǵyldaı.   Kezińde qyzyl gúldeı qulpyratyn, Sezimiń sergı almaı bulqynatyn. Kúıeýiń erkeletip otyrsa da, Kózińniń tereńinde muń turatyn.   Ardaǵym asyl Búbi, aǵym Búbi, Taǵylǵan taǵdyryńa taǵyn Búbi. Men seni ómir boıy saǵynarmyn, Alsam da bar álemniń baǵyn Búbi.   ****   Qara sháshti, qara kózdi, Qara qasty aq arý, Qyz bitkenge arman shyǵar sendeı bolyp jaralý. Órkókirek, tentek minez erkek edim ne kerek, Qıyn bop tur mańaıyńa bara alý.   Balalyqtyń bal dáminen basym edi jigittiktiń qarqyny, Qyz qylyqtyń qyzý órti alastady, sharpydy. Aınalsoqtap ketpeı qoıdy tózimimdi sarqydy, Seniń elpek qyzyǵyńa Meniń tentek buzyqtyǵym balqydy.   Aınalaıyn Aı músindi názik erke shyraǵym, Sezimimdi qytyqtady syńǵyr syńǵyr bulaq ún. Nege aqpaı tura qaldy uly aǵyn, Iyǵyma jetpeı turyp tuıyǵyńa qaıtyp qamap shydadyń.     ****   Shattanýshy em seni kórip kerilseń, Mas bolýshy em jan uıytyp berilseń. Ózge eshbir jan saıaqattap kórmegen, Maǵan ǵana tanys álem ediń sen.   Álemniń bar jınasam da kórkemin, Sen ǵana ediń tabatuǵyn dert emin. Ózge eshbir jan jalynyńa shydamas, Aq kóılekke orap qoıǵan órt ediń.   Bolyp edi til jetpeıtin tus talaı, Nege aıryldym máńgilikke ustamaı. Meni endi eski jurtqa qaldyryp, Sol kúnderdiń kózden bulbul ushqany-aı.   Adam sirá toıǵan ba bal-shekerge, Shekerge qol sermedim be bekerge. Baqyt tátti bolady eken árdáıim, Basta shalqyp turǵanda emes óterde. ***   Kóńilime sáýle shashqan shamshyraǵym – Seni oılap ystyq jas bop tamshyladym. Men senen anaý emes mynaý emes, Janyma serik etip jan suradym.   Sen biraq mendik bolyp jaralmadyń, Tentek em janyńa da bara almadym. Sarańnan nan dámetken suraýshydaı, Bostan bos ózińdi oılap alańdadym.   Bilmeımin úzik ánniń jalǵasy ma, Bulbul bop qonǵym keldi tal basyna. Bul júrek yryq bermeı yntalandy, Bireýdiń úzip qoıǵan almasyna.   Biri edim armany asqar asqaq uldyń, Basymdy taýǵa da urdym, tasqa da urdym. Men kázir júrek degen han-patshanyń, Aldynda áli bitken qasqa qulmyn.  

Jolyǵyp Saryarqanyń dalasynda, Aılanyp jan qıatyn janashyrǵa. Kóbeıtip kóńildiń muń nalasyn da, Esildiń bir qyz qaldy jaǵasynda. Eske sap erketotaı erkin kúndi, Muńaıtty júregime sher tundyrdy. Ulǵaıyp es toqtatqan er basymdy, Eriksiz jeliktirip jelpindirdi. Aıalap appaq júzin tulym ushy, Pa shirkin, netken ǵajap burylysy. «Baıaǵy qyzyl ishik kıgen qyzdyń» Qyr muryn, qıylǵan qas sińilisi. Kez qylsań jannyń mundaı qyz balasyn, Er turmaq esken jelden qyzǵanasyń. Sál ǵana alystasań shyrqyń ketip, Janyna aınalsoqtap júz barasyń. Kelbeti kedeı jandy baı qylady, Qudaı da tik qaraýdan qaımyǵady. Ólerde óń betine qarap ólseń, Ólim de óz narqynan aırylady. Kórgende shattyq nurǵa tolǵan óńin, Shyǵady tumshalanyp zorǵa demiń. Aqanmen túnniń bıin bıleıtuǵyn, Kók kóılek «kól perisi» sol ma dedim. Ózine qyzyqtyryp juldyzdardy, Qyzdyryp qylyǵymen túngi yzǵardy. Máńgilik qaıtalanbas arman bolyp, Esildiń jaǵasynda bir qyz qaldy.