Ózderin eldegi jalǵyz opozısıalyq partıa sanaıtyn bul partıanyń tóraǵasy Jarmahan Tuıaqbaıdyń joq bolyp ketkenine biraz ýaqyt boldy.
Oǵan jaqyn júretin adamdardyń aıtýyna qaraǵanda, Jarmahan Tuıaqbaı shetelde demalyp jatyr-mys. Eger shynynda da ol kisi shetelde demalyp jatsa, bul neǵylǵan bitpeıtin demalys?
Eger de, onyń betin ary qylsyn, Jarmahan Tuıaqbaı syrqattanyp qalsa, ol adamnyń tez saýyǵyp ketýine tilektestigimizdi bildiremiz...
JSDP tóraǵasy Jarmahan Tuıaqbaı «joǵalǵaly» beri elde nebir saıası jaǵdaılar, dúrbeleńder oryn aldy. Búkil el qazaq jerin satýǵa jáne jalǵa berýge ashyq qarsy shyqty. 21 mamyrda búkil Qazaqstan boıynsha beıbit sherý bastalmaı turyp, qansha adam ustaldy, qanshasy jazyqsyz sottaldy, mine, osyndaı dúrbeleń kezinde de Jarmahan Tuıaqbaı, «áý» dep jaq ashqan joq...
21 mamyrdaǵy oqıǵalarǵa qatysty merzimdi basylym betterinde jaryq kórip jatqan JSDP atynan jazylǵan saıası málimdemelerdi tóralqa músheleri: Baltash Tursymbaev, Serikbaı Álibaev, ÁmirbekToǵysev jáne t.b. azamattar daıyndaıtyn kórinedi. «Osyndaı saıası málimdemeler jasańdar! Senderge ýaqytsha ókilettigimdi beremin» dep aıtqan nemese tóraǵa retinde buıryq bergen Jarmahan Tuıaqbaı joq sıaqty.
Áńgimeniń týrasyn aıtqanda, jaryq kórip jatqan partıalyq bul saıası málimdemelerge JSDP tóraǵasy Jarmahan Tuıaqbaıdyń esh qatysy joq bolyp shyqty. Bul saıası málimdemelerge ol kisi ne «ıá», ne «joq» dep jaýap bermegen. Jarmahan Tuıaqbaımen bir sapta júrgen onyń murattas dostary da bul «únsizdiktiń» syryn bilmeıdi...
Jarmahan Tuıaqbaımen baılanystyń barlyq túri jaqbyq eken. Ol kisi ózi jaqsy biletin murattastary telefon shalǵanda da, telefon tutqasyn almaıtyn sıaqty. Qasaqana baılanysqa shyqpaı otyrǵan JSDP tóraǵasy Jarmahan Tuıaqbaı ma, joq, álde jaǵdaıdy ýshyqtyra túskisi kelgen bir «úshinshi kúsh pe?» Ol «úshinshi» kúshtiń kózdegen maqsaty ne? Álde Jarmahan Tuıaqbaıdy el basyna kún týǵandaı, myna qıyn kezeńde ony bireýler ustap alyp, halyqpen baılanysqa shyǵarmaı otyr ma?..
Osyǵan jaýap beretin bir jan bar ma eken?
Sonymen, JSDP tóraǵasy Jarmahan Tuıaqbaı qaıda?
Jumash Kenebaı
