Senbi kúni Astanada ótken Jer komısıasynyń otyrysy ádettegideı batyl málimdemeler men qatań syn, eskertpelerge toly boldy. Ondaı málimdemeler tek komısıaǵa turaqty múshe bolǵan sanaýly jer janashyrlary tarapynan ǵana emes, jıynǵa kelgen bylaıǵy jurt tarapynan da, bılik partıasy ókilderiniń de aýzynan shyǵyp jatty.

Sonyń biri ózin «Nur Otan» múshesi dep tanystyrǵan Aıdyn Egeýbaev aýylsharýashylyq maqsatyndaǵy jerlerdi shet elderge jalǵa berý Otanǵa opasyzdyq jasaýmen teń ekenin aıtyp, jer úshin narazylyq aksıalaryn ótkizgen azamattarǵa qoldaý bildirdi. Sózi bekitilgen reglamentke syımaı qalǵan ol jıyn ótip eatqan Ulttyq mýzeı dálizine shyǵyp taǵy málimdeme jasaǵan.

A. Egeýbaev Shyǵys Qazaqstan oblysy Úrjar aýdanynda qytaılyqtardyń 45 paıyzdyq úlesi bar birikken kompanıa qyzmet bastaǵanyn, onyń 8 myń ga jerge soıa egip jatqanyn, birikken kásiporynǵa Qazaqstan tarapynan 6 mlrd teńge, 20 mln dollar sheteldik ınvestısıa tartylǵanyn jaıyp saldy. Onyń aıtýynsha, kompanıanyń 45 paıyz úlesi qytaılyq Djan Veıdong (Zhang Weidong) degen azamatqa tıesili kórinedi. Mundaı qıturqylyqqa elimizdiń zańnamasy tosqaýyl qoımaıdy, sheteldikter úlesi 49 paıyzdan aspaıtyn kompanıalarǵa ýylsharýashylyq jerleri jalǵa beriledi.

«Nur Otandyq» ókil qazir Qytaıdan Qazaqstanǵa quramynda 16 adam bar delegasıa kelgenin, olar «Bátýa» kompanıasynyń enshile uıymdarynyń egis alqaptaryn aralap júrgenin aıtady. Tipti, delegasıa saparynyń kestesine deıin taýyp alǵan kórinedi.

«Delegasıa Úrjar, Eltaı aýyldarynda, Qostanaı, Pavlodar oblystarynda, Stepnogorsk qalasynda bolady eken. Olar onda ne úshin júr?», - degen A. Egeýbaev prokýratýra, UQK, «Nur Otan» basshylyǵy atalǵan faktige nazar aýdaryp, tekseris júrgizýi qajet deıdi.