Mońǵolıanyń qazaqtar qonystanǵan Baıan Ólgıı qalasynda sý tasqyny bolyp, júzden asa úı qıraǵan, - dep habarlaıdy Qamshy.kz Azattyqqa silteme jasap.
Oqıǵa 10 shilde kúni bolǵan. Jańbyr saldarynan bolǵan sý tasqyny kesirinen 130 úı qulap, 700 shaqty adam baspanasyz qalǵan. Adam shyǵyny da bar kórinedi.
Baıan-Ólgıı qalasynyń turǵyny Muratbek Bádeıulynyń aıtýynsha, 15 mınýttaı ǵana jaýyp ótken burshaqtayń sońy osyndaı apatqa ulasqan.
- Shildeniń 10-y shamamen keshki saǵat bes mólsherinde 15 mınýttaı burshaq jaýdy. Burshaqtan soń qalanyń bir jaq shetinde kóshkin bolyp, 200-ge jýyq úıdi qora-qopsysymen qosa shaıyp ketti. Qulaǵan úı astynda tórt jasar bala qalyp qoıǵan. Selden keıin qulaǵan baǵandaǵy elektr symyna soǵylyp taǵy bir adamnyń mert bolǵan, - deıdi ol Azattyqqa.
Qala turǵyndarynyń aıtýynsha, qalanyń ortasyn jaryp aǵatyn Qobda ózeniniń sol jaq jaǵalaýyndaǵy úılerdiń bir bóligi tasqyn kezinde sý astynda qalǵan.
Mońǵolıalyq bloger Janarbek Aqybı «úsh kúnnen beri sý shaıǵan aýmaqty aralap, jaǵdaıdy baqylap júrgenin» aıtady.
- Jyldam ári qatty bolǵany sonsha, 10 neshe mınýt ishinde túsken burshaq qalyńdyǵy bes santımetrden asyp ketti. Qala mańy taý bolǵandyqtan, [erigende sýy] jerge sińbeı kóshkinge ulasyp, qalanyń altynshy, toǵyzynshy bólikterin sý alyp ketti. Kóshkin qatty bolǵany sonsha, úılerdiń tóbesi ortasyna túsip, qabyrǵalary qaqyrap ketken. Tipti sý shaıǵan jerge qaıtadan úı turǵyzý múmkin emes, - deıdi Janarbek Aqybı.
Bloger «Úıin sý shaıyp ketken turǵyndardyń keıbiri kıiz úı tigip, ýaqytsha panalap otyrǵanyn » aıtty.
- Ólgeıdiń (qalany aıtady – red.) ústinde qara bult áli seıilgen joq. Kóshkin qaıtalanýy múmkin degen kúdikpen kóligi barlardyń bári taýda júr. Aımaq ákimshiligi men komısıa músheleri de kóshkin qaýpi bolady degen taýly aımaqtaǵy joldardy baqylaýmen shektelip otyr. Japa shekkenderge úı salýǵa jer bólinip berildi. Basqa kómek kórsete alǵan joq, - deıdi Aqybı.
Janarbek Aqybıdiń sózin Baıan-Ólgıı aımaǵy ákimi Dármen Quzykeıuly da rastady.
- 170 úı kóshkin jolynda qalyp qoıdy. Sonyń 100-i turýǵa múldem jaramsyz bolyp, 700 adam baspanasyz qaldy. Qazir múmkindigi barlar aımaq ákimi tarapynan bólingen jerlerge ýaqytsha kıgiz úı tigip otyr. Al múmkindigi joqtar mektep jataqhanalaryna ornalasty. Ázirge aımaq ákimdigi tarapynan kórsetilgen kómek osy ǵana. Endi úkimetten úı salýǵa qarjylaı kómek surap jatyrmyz, - deıdi ákim.
Tórt jasar balanyń úı astynda qalyp qoıǵany týraly derekti rastaǵan Dármen Quzykeıuly «mal-múlik shyǵyny áli tolyq eseptelmegenin» aıtty.
Al, Janarbek Aqybı «selden zardap shekkender úısiz qalamyz ba dep qatty alańdap otyrǵanyn» aıtady.
- Zardap shekenderge qaıta úı salý máselesin ázirge eshkim sheshe qoıǵan joq. Halyqtyń alańdaýyna menińshe úsh úlken sebep bar, - deıdi ol.
Janarbek Aqybı «eń birinshi sebep» retinde jaqynda ótken (maýsymnyń 29-y) Mońǵolıa parlamenti saılaýyn atady.
- Zań boıynsha saılaýda keıin bılik 30 kún ishinde eshqandaı qarjyǵa buıryq shyǵara almaıdy. Sondyqtan jańa basshylar (parlamentte jańadan qurylatyn úkimetti aıtady – red.) jumysyna tez kelgeni durys, - deıdi Aqybı.
Ol «Zardap shekken jurtqa qarjylyq turǵydan ázirge jeke tulǵalar ǵana kómektese alatynyn» aıtady.
Mońǵolıa qazaqtarynyń tabıǵat apatynan zardap shekkeni týraly dúrbeleń bul elden oralmandar kóship kelip jatqan Qazaqstanǵa da jetken. Qazaqstandyq belsendiler Facebook jelisinde búgin jylý jınaı bastaǵandaryn habarlady. Sonyń biri Aıatjan Ahmetjan:
- Qazir ol jaqpen Amangeldi Qurmetuly degen azamat habarlasyp, qandaı kómek keregin uǵysyp jatyr, kelesi dúısenbi aýdarylǵan aqsha [bolsa] jáne basqa da kómekterdi alyp Amankeldi ekeýimizdiń birimiz jol tartamyz, – deıdi.
Sany 150 myń dep shamalanatyn jáne kórshiligi Baıan-Ólgıı aımaǵynda turatyn etnıkalyq qazaqtar Mońǵolıa halqynyń 5 paıyzy bolady.
