Úıi sot sheshimimen súrilýi tıis astanalyq Ádilbek Meıramovqa úsh bólmeli páter berilgen. Al, burynǵy baspanasy sot sheshimine saı súrildi,  - dep habarlaıdy Qamshy.kz Azattyqqa silteme jasap.

Búgin keshkilik Facebook áleýmettik jelisinde Astana ortalyǵyndaǵy Ádilbek Meıramovtyń úıin súrip jatqan foto jarıalandy.

Meıramovtyń ózi Azattyqqa búgin otbasymen Astananyń ońtústik-shyǵysyndaǵy aýdandardyń birine úsh bólmeli páterge kóshkenin habarlady. Onyń aıtýynsha, páterdi «qala ákiminiń aralasýymen demeýshiler bergen».

Meıramov basqa da qosymsha aqparattardy aldaǵy ýaqytta aıtýǵa ýáde berdi.

24 maýsymda Meıramovtar otbasyn Astananyń ortalyǵyndaǵy jeke menshik úıinen shyǵarýǵa kelgen sot oryndaýshylary bes saǵattan astam ýaqyt boıy talpynǵanymen, esh nátıje shyǵara almaǵan edi. Úıdi ishinen jaýyp alǵan otaǵasy Ádilbek Meıramov eger úıge bóten adam jaqyndaıtyn bolsa qolyndaǵy gaz balonyn jaryp jiberetinin eskertip, balonǵa qosa sirińke, tamyzyq gazet ustap, baspanasyna sot oryndaýshylaryn kirgizbeı qoıǵan.

Terezeden basyn shyǵaryp turǵan ol «úıde úsh jas balasy bar» ekenin aıtyp, qala ákimi Áset Isekeshevpen kezdesýdi jáne ózine tólenetin ótemaqy máselesin sheshý úshin arnaıy komısıa qurýdy talap etken bolatyn.

Sot buǵan deıin Meıramovtardyń jeri «memleketke qajettiligine» baılanysty úıin súrý týraly sheshim shyǵarǵan. Ádilbek Meıramovtyń sózinshe, sot otbasyna eki mıllıon 60 myń teńge kóleminde ǵana «ádiletsiz ótemaqy» taǵaıyndaǵan. Ol bul somaǵa basqa úı satyp ala almaıtynyn aıtady.