Salafızmdi zańmen tyıym salýǵa kelgende basqa standarttardy alǵa tartý durys emes. Búgin Parlament Májilisinde «Qazaqstan Respýblıkasynyń keıbir zańnamalyq aktilerine ekstremızm jáne terorızm máseleleri boıynsha ózgerister men tolyqtyrýlar engizý týraly» zań jobasynyń tanystyrylymy barysynda din mamany Qaırat Joldybaıuly osy máseleni kóterdi, - dep habarlaıdy Qamshy.kz QazAqparatqa silteme jasap.
«Búgingi zań jobasynda menińshe, terrorlyq aktilerdiń aldyn alýǵa baǵyttalǵan zań normalary kóbirek qarastyrylǵan dep oılaımyn. Ekstremızm, shekten shyǵý, qoǵam arasyna iritki salý, adamdardy qatygezdikke tárbıeleýge qatysty normalar tıisti deńgeıde qarastyrylmaǵan. Meniń pikirimshe, qoǵam osyny kútip otyr. Árıne, qarý-jaraqty, kóshi-qondy qadaǵalaý durys. Qarýdy shekteý kerek. Alaıda, sana ekstremızmge daıyn bolsa, oǵan qandaı da bir qarýdyń qajeti de shamaly. Buǵan bir ǵana mysal Fransıada júk kóligimen de jurtty taptap óte shyqqanyn bilesizder», - dedi Qaırat Joldybaıuly.
Bul rette din mamany ekstremızmmen kúres jaǵyn qataıtýdyń qajettigin alǵa tartady. Sonymen qatar, Qaırat Joldybaıuly ınternet saıttary arqyly áli kúnge túrli ekstremıstik baǵyttaǵy kitaptardyń, ádebıetterdiń órip júrgenine toqtaldy. Onyń aıtýynsha, bul jaǵyn da kóbirek qadaǵalaý kerek.
«Árıne, ıdeologıaǵa ıdeologıamen qarsy turamyz degen durys. Alaıda, Qazaqstanda buryn «Tablıǵı jamaǵat» degen aǵym bolǵan, ol ıdeologıa, esh jerde tirkelmegen aǵym edi. Osyǵan biz zań arqyly tosqaýyl qoıdyq, tyıym saldyq. Al endi týra sol sekildi salafızm aǵymyna kelgende biz basqa standarttar oılap ketemiz. Nege bulaı? Ideologıaǵa qarsy kúres úshin de memleketten qoldaý da kerek, qarajat ta bólinýi kerek. Osyny eskerseńizder», - dedi Q. Joldybaıuly.
