Elordanyń irgesindegi «Qazanat» atshabarynda alǵash ret «Astana juldyzy» respýblıkalyq týrnıri ótti. Ulttyq sport túrlerinen ótken týrnırge elimizdiń 14 oblysynan jáne Astana men Almaty qalalarynan komandalar qatysty.Táýelsizdiktiń 25 jyldyǵyna arnalǵan dúbirli dodany Astana qalasynyń ákimi Áset Isekeshev saltanatty túrde ashty, - dep habarlaıdy Qamshy.kz.
Ulttyq sport túrlerinen ótken týrnırge elimizdiń 14 oblysynan jáne Astana men Almaty qalalarynan komandalar keldi.
- Ulttyq sport túrleri bizdiń tereń tarıhymyz ben mádenıetimizdiń ajyramas bóligi. Astana qalasynyń ákimdigi ulttyq sport oıyndarynyń jandanýyna, buqaralyq sportty damytýǵa jáne salaýatty ómir saltyn qalyptastyrýǵa únemi qoldaý kórsetip keledi. Osy maqsatta jyl saıyn qalamyzda ulttyq oıyndar men jarystar boıynsha 200-den asa is-shara ótkizilýde. Endi mine, taǵy bir jobany iske asyryp otyrmyz. Búgingi festıvál dástúrli sport oıyndary men ulttyq salt-dástúrimizdi jańǵyrtqan, halyqqa rýh bergen, Táýelsizdik mereıtoıyna arnalǵan keremet shara. Elorda ákimdigi aldaǵy ýaqytta da osyndaı jobalardy qoldap, ulttyq sport túrleri men salt-dástúrlerimizdi nasıhattaýǵa kóńil bóletin bolady. Elbasymyzdyń bastamasymen osy «Qazanat» atshabarynda jalpy kópshilikti ulttyq sport túrlerine baýlıtyn arnaıy Ortalyq ashýdy josparlap otyrmyz.
Qudaı qalasa, munda qarapaıym halyqqa atqa minýdi úırenýge, aýdaryspaq, asyq atý, toǵyzqumalaq oınaýǵa jáne ózge de ulttyq sport túrlerin úırenýge jaǵdaı jasalady. Prezıdentimiz 2020 jylǵa deıin halyqtyń 30 paıyzyn dene shynyqtyrý men sportqa tartý týraly tapsyrma bergenin bilesizder. Osy rette, Astana qalasynyń ákimdigi aldaǵy eki jylda buqaralyq sportty damytý maqsatynda qala boıynsha 22 sport alańyn salýdy josparlaýda, - dedi elorda basshysy Áset Isekeshev.
At shaptyrym jerde halyq aldymen teńge ilý saıysyn tamashalady. Odan keıin Qyz qýý kóptiń kóńilinen shyqty. Al bilektiler Aýdaryspaqta at ústinde alysty. Úsh kúnge jalǵasqan týrnırde kókparshylardyń ishinen Astana quramasy men Aqmola oblysynyń komandasy fınalda synǵa tústi.
Ulttyq oıyndarǵa janashyrlyq tanytqan Astana ákimi Áset Isekeshev te sadaq alyp, elý metr qashyqtyqtan nysanany dál kózdegen mergendigin kórsetti.
Dýmandy shara barysynda «Qazanatqa» qazaq aýyly qondy. Munda 13 kıiz úı tigilip, jınalǵan jurtqa ulttyq taǵamdardan dám usynyldy. Sondaı-aq jastar úshin altybaqan qurylyp, balalar asyq oınap, láńgi tepti.
Sonymen, «Altyn juldyzy» respýblıkalyq týrnıriniń bas júldesine Astana ákimi Áset Isekeshev avtokólik tikti. Bul júldeniń ıegeri orta qashyqtyqtaǵy júırikter báıgesinde anyqtaldy.
