Dindi aıaqasty qylǵan KSSRO memleketi kúırep tyndy. Súıtip halqymyz armandaǵan táýelsiz Qazaq eli qurylyp, komýnıser mansuqtaǵan musylman dini elimizde laıyqty ornyn aldy. Kókiregimizde 70 jyl qatparlanǵan dinı saýaldarymyzdyń da jaýabyn taptyq. Ásirese, barlyq adamzatty tolǵandyrǵan o dúnıeniń barlyǵy Quranda tolyq baıandalsa da, ahırettiń joqtyǵyna shúbáláný, Qurannyń qasıetine nuqsan keltiretin. Al óz basym o dúnıeniń barlyǵyna shúbásiz senýime tómende baıandalǵan tylsym ýaqıǵa sebep bolǵan edi:
- Anam Gúlbahrom, aýyr naýqastan fánıden baqılyqqa ozdy. Anamdy sońǵy saparǵa shyǵaryp salýǵa kelgen qaraly toppen birge aýyl shetindegi qorymǵa qaraı bet aldym. Shilde aıy. Aspanda bir shókim bult joq, kún shaıdaı ashyq. Kún nuryn aıamaı tókse, aınala tabıǵat ta, meniń qaıǵymmen ortaqtasqandaı eńsesi túsip maýjyryp turǵan bolatyn.
Tabıǵattyń osy ǵajaıyp qubylysymen jan dúnıem tutasyp, kúızelip kele jatsam, deneme jańbyr tamshylary tamyp ótti. Shaıdaı ashyq aspanǵa kóz salsam, dál tóbemde bir aq shókim bult qalyqtap tur. Men bul tosyn jaǵdaıǵa tańǵala qarap «qarańdarshy, tóbemde qalyqtap turǵan aq shókim bulttan maǵan jańbyr tamshylary tamyp ótti», - dedim dostaryma. Olar aspanǵa kóz súze qarap «ne dep tursyń?» degendeı maǵan kúdiktene qaraǵan soń, únsiz ǵana tóbemde qalyqtap turǵan shókimdeı aq bultqa tańqala qaraýmen boldym.
Anamdy jer qoınyna berip, jas qabirdiń basynda, qabyrǵam qaıysyp, qalyń oıda otyr edim, tánime tıgen jańbyr tamshylarynan selk etip, shaıdaı ashyq aspanǵa kóz salsam, qol sozym jerde manaǵy aq shókim bult qalyqtap tur. Zer sala qarasam, saǵym sıaqty buldyraǵan aqsha bult. Men bul qubylysqa qaıran qaldym. «Bul ne ǵalamat, álde tylsym dúnıesinen qalyqtap kelgen anamnyń rýhy ma?» degen oqys oı jan-dúnıemdi astań-kesteń qyldy.
Bir ýaqytta denemdi aqsha bulttan tamǵan tamshylar urǵylaı bastady. Sodan kózimnen aqqan jas pa, álde jaýǵan jańbyrdyń tamshylary ma (álde anamnyń kóz jasy ma) júzimdi jýyp ketti. Kóńilim bosap «O, Anashym, erjetken soń, bar dúnıeniń jaqsylyǵyn sizge syılap, baqytty júzińdi kórem dep armandaýshy edim. Biraq, sum ajal bul tátti úmitimdi úzip ketti. Ne isteıin, aǵat ketken jerlerim, balalyqpen kóńil bólmeı ketken kezderim bolsa keshe gór», - dep kókirekke keptelip kelgen jas tamshylary anamnyń topyraǵy keýip úlgermegen qabirine tamyp jatty.
Sol kezde tóbemde qalyqtap turǵan aqsha bult ta, meniń aıtqan sózimdi estigendeı qalyqtaı-qalyqtaı kók aspannyń tuńǵıyǵyna sińip bara jatty...
Qazir anamnyń basyna barsam, mindetti túrde kók aspanǵa kóz salyp, shókimdeı aqsha bultty izdep turamyn...
Ersin Erǵalıev
