Qazaq – aýyr aıaq áıel sıyr etine jerik bolsa, keıin týylǵan balasy sıyrdaı kúshti bolady. Zor deneli keledi, adýyn azamat bolyp er jetedi dep nanady. Sıyr etiniń jeriginen týylǵan bala óńi sýyq, minezi qyrsyq, biraq ishki áleti jyly, sezimi ystyq bolady. Eger mundaı adamǵa áldebireýler kóńiline qaramaı qarsy kelse, ol qarsy jaǵyn múlde músirkemeıdi. Buqadaı burqyrap, sıyrdaı shaıqap, múıizdi sózben aıamaı irep-irep tastaıdy. Ol adamdy ekinshi ary izdemeıdi. Tipti, at kekilin kesisip, odan birjola boıyn aýlaqqa salyp, qol úzisip ketedi. Qarsy jaǵy onyń aldyna keshirim surap kelse de, minezi qatqyldanyp, ońaı-ospaq ıilmeıdi. Tez syna salmaıdy. Qatqyl keledi. Soǵan qarap keıbir adamdar bulardy «qyrsyq minezdi» dep jatady.

Qazaqta «sıyr sýdan jaralǵan», «sıyr piri – zeńgi baba», «sıyrdaı qyz», «buqadaı azamat», «sózi súzegen buqadaı», «sıyrdaı kımeledi», «sıyrsha kúısedi», «enemniń sıyryndaı dáý qyz», «tana kózdi», «taıynshadaı momaqan», «sıyrdaı ókirip jylady», «sıyrdan jyǵylsań múıizin tosady, jylqydan jyǵylsań jalyn tosady», «sıyry barda qatyq bar», «saýda – saýyn sıyr tárizdi» degen teńeý sóz tirkesteri tórt-túlik mal baqqan malshy qaýym arasynda ár kúni qoldanylyp júrgen úırenshikti sózder. Biraq, osy sózder keıde adam minezin de ashyp kórsetedi.

Bolat Bopaıuly Jota Qajy