Baqbaq gúl – gúldiń aty, dala gúline jatady.

Bul gúl naýryz, kókek aılarynda jáne jaz aılarynda úlpildek maqta tárizdi gúl ashady. Gúline sál jel tıse boldy, úlpildek maqta tárizdi gúl júnderi ushyp ketedi.

Qazaq ony «baq-baq», «baqbaq gúl» dep te ataıdy. Kúrdeli gúlder tuqymdasyna jatqyzady, sarǵaldaq gúlderiniń gúldes týysy dep biledi. Onyń úlpildek gúli jel tıse ushyp ketetin qasıetine qarap, ony qazaq «tozǵanaq» dep te ataıdy.

         «Baqbaq» nemese «sarǵaldaq» gúlin qazaq gúl bapkerleri kóp zerttegen, erte tanyǵan. Baqbaq gúli kúrdeli gúlder týysy, kópjyldyq shóptesin ósimdik. Bul gúldiń sabaǵy qýys, japyraqsyz taqyr, sútti, shyryndy. Japyraqtary qaýyrsyn pishindi, jıegi tegis, tamyr moınyna aınala shoǵyrlanyp ósedi. Gúlderi qos jynysty, túsi sary, sabaq ushynda tostaǵansha tárizdi dóńgelenip ornalasqan. Jemisi dánek, jelmen beıimdelgen. Jer sharynda 100-ge jýyq túri ósedi.

         Qazaqtyń baıyrǵy emshileri baqbaq gúlin dári dep biledi. Jemisi pisýden buryn qazyp alyp, jańa kúıinde nemese keptirip paıdalanady. Baqbaq egistik arasynda, jol jaǵasynda, ózen saǵasynda ósedi. Jer sharyna eń kóp kólemde taraǵan gúl. Baqbaqtan jasalǵan dáriniń dámi kermek, sýyq raıly, ýytsyz. Bul dári ystyqty basady, ýytty qaıtarady, isikti qalpyna keltiredi. Omyraý beziniń, kóz dáneker beziniń qabynýyna, teriskenge, badamsha beziniń jedel qabynýyna, ótke paıdalanylady.

         Qazaq balalary naýryz, kókek aılarynda alǵash baq-baq gúl jaryp, kóktegen kezde gúldi úzip alyp, onyń úlpildek gúlin úrlep, «baqa-baqa baq-baq, teke-teke tek-tek» dep oınaıdy.

Bolat Bopaıuly Jota Qajy