UBT-dan uıalyp, ulym «uıyqtap» qalmasyn» degen oımen bir aı boıy daıyndyq jumystaryna kirisip ketken edim. «Balam, UBT degen – untaq-talǵan bir túrli taǵam emes, Ulttyq biryńǵaı testileý!» deımin ǵoı. Sonyń ózinde, balam betine balshyq jaǵyp alady. «Áı, nege búıtesiń?» dep surasam, «Bir túrli qorqyp turmyn. Betim qyzarmasyn degenim ǵoı» deıdi. Mektep bitirgen ulymnyń balshyq–balshyq betinen súıip, ózim de qaltyrap kettim. UBT degen– ultty uıatsyzdandyratyn bir pále bolyp barady emes pe? Sodan, UBT bolatyn kúni balamdy táýipke túshkirtip, mańdaıynan súıip, mıyna bar aqylymdy úıip, «toqtap qalǵan joq pa?» degen oımen júregin tyńdap, «Bar, bara ǵoı, botam!» dep ymdap, shydamsyzdana shyǵaryp saldym. Sodan, bir top ata-analar UBT ótip jatqan ǵımarattyń aldynda Qudaıym¬yz¬ǵa sıynyp turmyz. Bir kezde bir oqýshy esikten qısalańdap shyqty da, aspanǵa aqıa qarap, qulap qaldy. Áke –sheshesi bolsa kerek, júgirip baryp, betine sý shashyp jatyr. Sóıtsek, UBT-nyń uıatsyz, maǵynasyz, túsiniksiz suraqtary júıkesine áser etip, tentek bolyp shyǵypty. Jarty saǵattan keıin jazylyp ketti. Qudaı-aı, meniń balam da esalań bolyp shyqpasa edi! Bir ýaqytta bir qyz esikten eńbektep shyǵyp kele jatyr! «UBT úshin alǵa-a! Biz jeńilmeımiz!» –dep aıqaılap qoıady. Ol da jyndanyp shyǵypty! Sheshesi táýip ertip kelgen eken, táýip tańdaıyn kóterip, duǵa oqyp, jany qaldy áıteýir. Myna jerde turyp, ata-analardyń bir sypyrasy shuǵyl túrde jyndanyp jatty. Bir-birine qarap yrjıady ma, bir-birin qýalap júrip, arqalaryna yrǵyp minip alady ma, er kisi aınaǵa qarap: «Men erkek ekenimdi dáleldeımin!» deıdi me... Taǵy bir top test tapsyrýshylar topyrlap shyǵyp, «horom» jylap jatty. Qudaı-aı, balam aman esen oralsa edi! Kishkentaı¬ynan júregi aýyrýshy edi! Osylaı oılap turǵanym sol, balam súıretilip, súmetilip shyqty. Sosyn yrjalaqtap kúle berdi. –Áı, nege kúle beresiń? –dep suradym men. –Kúlmegende? Kúldirgi suraqtar bolsa... –Ne degen sumyraı suraqtar edi? –Almatydaǵy syra zaýyty qashan salynǵan edi, áke? –E, men qaıdan bileıin? Bilimge onyń qandaı qatysy bar? –Bilim mınıstri syrany jaqsy kóretin shyǵar? –Qoı, olaı deme! Taǵy qandaı «tentek» suraqtar boldy? –«Abaı Qunanbaev nasybaı atqan ba?» –Jyndy shyǵar mynalar? –«It ıtti jumsaıdy, ıt quıryǵyn qalaı jumsaıdy?» deıdi...–degen balam tyrqyldap kúldi. Oǵan qosylyp men de, qasymda turǵan ózgeler de kúldi. –A? –dedim aýzymdy alaqanymmen basyp. –«Tom ı Djerı» múltfılminde oınaǵan tyshqan qazir tiri me?» deıdi... –dedi de, balam jerge jata qalyp, aýnap kúlgeni. «Jalǵyz ózi jerge aýnaǵany yńǵaısyz bolar» dep, men de jerge jata qalyp, aýnap, qarqyldaı kúldim. Bir qarasam, ózge ata-analar da jerge aýnasyp, birin-biri qytyqtasyp, keńkildesip kúlip jatyr eken. «Tentek testiń» áseri ǵoı... Balam ekeýmiz úıge jetkenshe jyrq-jyrq kúlisip bardyq. Nege kúlip jatqanymyzdy surap, sheshesi shıqyldaı kúldi! Áli kúlip jatyrmyz. Kórshiler de kúlip jatyr... Búıtip kúlgeni qurysyn!