"As - adamnyń arqaýy" degen qaǵıdany joǵary ustanatyn ıtalıalyqtar bolsa, elimizdiń et óńdeý salasyna 100 mln eýrodan astam ınvestısıa quımaq. Aqtóbe et óńdeý kompanıasy men Italıanyń transulttyq korporasıasy «Qazaqstandyq et brendi» jobasyn iske asyrýda. Eki el kásipkerleri arasynda áriptestik memorandýmy bar. Italıalyqtar et óńdeý salasyna 100 mln eýrodan astam ınvestısıa quımaq. Bul qarjyǵa Aqtóbe, Batys Qazaqstan jáne Qostanaı oblystarynda 44 myń bas malǵa arnalǵan 3 bordaqylaý alańy salynady. Sonymen birge, Alǵa aýdanynda ornalasqan et kombınatynda jańǵyrtý jumystary júrgiziledi. Keshen bıyldan bastap eksportqa 12 myń tonna ónim daıyndaıtyn bolady. 10 myń bas iri qaraǵa arnalǵan fermada negizinen asyltuqymdy «Angýs» sıyrlary bordaqylanady. Tez salmaq qosatyn, eti «mármar» sıyrlar jergilikti klımatqa tolyq beıimdelgen. Kelgeli tóldeı bastaǵan maldyń basy kóbeıip keledi. Al ıtalıalyq korporasıa mamandary «Qazaqstandyq et brendin» jasap, ony Eýropa men Reseı naryǵyna shyǵarýdy dittep otyr. Bordaqylaý alańdary salynyp, kombınat jańǵyrtylǵannan keıin, jergilikti turǵyndar da jumyspen qamtylady. Jalpy, óńirde 1 mln gektar aýyl sharýashylyǵy jeri bolsa, onyń 50%-y áli kúnge ıgerilmeı jatyr. Osy oraıda, Iran men Túrkıa eliniń ınvestorlary birneshe jobaǵa qarjy quıýǵa nıetti. Ázirge kelissózder júrgizilýde. «Birinshiden, jumys orny ashylady, ár aýdan búdjetine, oblys búdjetine salyq túsedi. Jerdiń ózi de bostan-bos jatpaýy kerek, jer jumys jasaýy kerek mindetti túrde, paıda bolýy kerek. Bul shetelden kelip jatqan ınvestorlar jerdi eshqashan satyp ala almaıdy. Ol qazirgi zańda kórsetilgen. Sondyqtan, jer tek jalǵa beriledi. Qazaqstannyń óz zańyna sáıkes, jerdi paıdalaný týraly erejesi bar, sol erejege sáıkes qadaǵalanady»,- deıdi oblystyq aýyl sharýashylyǵy basqarmasy bastyǵynyń orynbasary Asylhan Ábtıev.
Qazaqstandyq dıplomattar bolsa, Rýmynıa jerinde qaza tapqan Shernıaz Aıaǵanovtyń beıitine gúl shoqtaryn qoıdy. Uly Otan soǵysyndaǵy Jeńistiń 71-jyldyǵyn merekeleý sheńberinde Rýmynıada birqatar saltanatty is-sharalar ótti. Bul týraly Qazaqstannnyń Rýmynıadaǵy Elshiligi habarlady. 6 mamyrda Qazaqstannyń Rýmynıadaǵy Elshisi Dáýlet Batyrashev Býharest qalasyndaǵy Herestreý saıabaǵynda (Parcul Herăstrău) keńestik jaýyngerler jerlengen memorıaldyq kesheninde gúl shoqtaryn qoıý saltanatty rásimine qatysty. İs-sharada soǵys ardagerleri, dıplomatıalyq korpýs basshylary men qyzmetkerleri, rýmyn astanasynyń jergilikti ókimet pen qoǵamdyq-saıası uıymdary basshylary, Rýmynıanyń Ulttyq qorǵanys mınıstrliginiń áskerı qyzmetkerleri jáne BAQ ókilderi qatysty. 9 mamyrda Qazaqstannyń Elshiligi Reseılik ǵylym jáne mádenıet ortalyǵymen uıymdastyrylǵan jáne Býharest qalasynda alǵashqy ret ótken «Máńgilik polk» azamattyq aksıasyna óziniń úlesin qosty. Qatysýshylar Uly Jeńiske óz úlesin qosqandardyń barlyǵyn eske aldy. Rýmyndyq «Máńgilik polkiniń» tiziminde júzden astam maıdangerlerdiń esimderi, sonyń ishinde Qazaqstannan jaýyngerler men ofıserleri de bar. 10 mamyrda qazaqstandyq dıplomattar Iassy ýeziniń Strýnga aýylynyń ákimdigi basshylyǵymen birge Ekinshi Dúnıejúzilik soǵystyń qatysýshysy qazaqstandyq Shernıaz Aıaǵanovtyń beıitine gúlderin qoıdy. Eskertkish 2009 jyly ornatyldy. Vıse-mer Ioan Agafıseımen ótken kezdesý barysynda, atalmysh eskertkishti jergilikti ákimshilik óziniń qorǵaýyna alatyndyǵy jóninde kelisildi. Tirkelgen derekterge sáıkes, Rýmynıadaǵy 171 keńestik áskerı zırattarynda 56 myńǵa jýyq keńestik áskerler men soǵys qurbandary jerlengen.
Brıtandyq tanymal saıası jáne qoǵam qaıratkeri Lord Frensıs Mod bolsa, qazaq-brıtan yntymaqtastyǵyn damytýǵa nıetti. Qazaqstan Respýblıkasy Prezıdentiniń janyndaǵy Memlekettik basqarý akademıasynda rektor Bolatbek Abdrasılov lord Frensıs Modpen kezdesti. Kezdesý barysynda Frensıs Mod Ulybrıtanıanyń Mınıstrler kabınetinde memlekettik qyzmettiń damýyna jaýapty bolǵanyn jáne osy salada birqatar reformalar jóninde bastama kótergenin, sonymen birge memlekettik basqarý júıesine ınovasıalardy engizýmen aınalysqanyn aıtty. Nátıjesinde memlekettik jobalar men baǵdarlamalardyń aýdıt júıesi engizilip, iri jobalardy basqarý jónindegi arnaıy agenttik qurylǵan. Onyń basshylyǵymen Kóshbasshylyq akademıasy ashylǵan jáne Oksford ýnıversıtetiniń Saıd bıznes-mektebimen birlesip, memlekettik organdardyń basshylaryn jobalyq basqarý boıynsha oqytý úshin arnaıy oqý baǵdarlamalaryn ázirlegen. Bul Ulybrıtanıada ıkemdi jobalyq basqarý qaǵıdattary men olardy baǵalaý júıesin qysqa merzim ishinde engizýge múmkindik berdi. Sonymen qatar, jobalardy iske asyrý tıimdiligin tekserý nátıjeleri týraly esepterdi turaqty túrde jarıalaý engizilip, azamattardyń memleketke degen senim deńgeıin arttyrýǵa yqpal etti. Osylaısha, ulttyq jobalardy basqarý bóliginde, úkimettiń ashyqtyq jáne aıqyndyq qaǵıdattary is júzine asyryldy.
Rektor B.Abdrasılov bolsa óz kezeginde Akademıadaǵy oqý prosesin jańǵyrtý, memlekettik qyzmetshilerdi oqytýda ınovasıalyq tásilderdi engizý, Qazaqstannyń memlekettik basqarý júıesine ınovasıalyq tásilderdi engizý boıynsha jańa bastamalar ázirleý barysy týraly jáne Ulybrıtanıanyń memlekettik organdarymen, oqý oryndarymen, sondaı-aq, brıtandyq memlekettik basqarý júıesine jobalyq enedjmentti engizýmen aınalysqan kompanıalarmen ózara is-qımyl tájirıbesi jóninde áńgimeledi. Kezdesý sońynda lord Mod Akademıanyń qyzmetine joǵary baǵa berdi jáne ekijaqty yntymaqtastyqty damytýǵa, onyń ishinde Qazaqstannyń memlekettik organdarynyń basshylaryna arnalǵan jobalyq menedjment boıynsha semınarlar sıklin Akademıa bazasynda uıymdastyrýǵa qyzyǵýshylyq tanytty.
