Búgin Qazaqstan Respýblıkasynyń Demokratıalyq jańarý kúni. 1991 jyly jeltoqsannyń 12-inde Qazaqstan Respýblıkasy Prezıdenti Nursultan Nazarbaevtyń «Qazaqstandaǵy 1986 jylǵy 17-18 jeltoqsandaǵy oqıǵalarǵa qatysqany úshin jaýaptylyqqa tartylǵan azamattardy aqtaý týraly» Jarlyǵymen Qazaqstandaǵy 1986 jylǵy jeltoqsannyń 17-18-indegi oqıǵalarǵa qatysqany úshin qylmystyq, ákimshilik jáne tártiptik jaýapqa tartylǵan adamdar aqtaldy dep jazady baq.kz
Sonymen qatar atalǵan Jarlyqtyń 4-tarmaǵy boıynsha jeltoqsannyń 17-i - Qazaqstan Respýblıkasynyń Demokratıalyq jańarý kúni dep jarıalandy.
Sondaı-aq osy kún Jeltoqsan qurbandaryn eske alý kúni de. Bul kúni Qazaq halqynyń azamattyq jáne saıası pozısıasyn aıqyn ańǵarta bilgen, 1986 jylǵy jeltoqsannyń 17-18-indegi qandy qyrǵynda opat bolǵan jastardyń arýaǵyna syıynyp, quran oqylady.
Eske sala keteıik, budan 30 jyl buryn 1986 jylǵy jeltoqsannyń 17-19-y aralyǵynda Almatyda qazaq jastarynyń KSRO bıliginiń otarshyldyq, ámirshil-ákimshil júıesine qarsy narazylyq qımyldary oryn aldy. Kóterilistiń bastalýyna Máskeýdegi ortalyqtyń respýblıka halqynyń pikirimen sanaspastan Reseıdiń Ýlánov oblystyq partıa komıtetiniń 1-shi hatshysy G.V.Kolbındi Kazaqstan Kompartıasy OK-niń 1-shi hatshysy etip taǵaıyndaýy túrtki boldy.
Jeltoqsannyń 17-i kúni tańerteńgi saǵat 8-de qaladaǵy L.I.Brejnev atyndaǵy alańǵa (qazirgi Respýblıka alańy) saıası táýelsizdikti talap etken urandarmen alǵashynda 300-deı adam jınalyp, keshkisin ereýilshiler sany 20 myńǵa jetti. KSRO-nyń totalıtarlyq, otarshyl saıasatyna qarsy qazaq jastarynyń azattyq kúresi tarıhı mańyzy bar úlken oqıǵa boldy.
Qazaqstan tóýelsizdigin alǵan soń Jeltoqsan kóterilisi týraly shyndyq qalpyna keltirilip, bul jóninde «Jeltoqsan. 1986. Almaty.», «Jeltoqsan qurbandaryn joqtaý», «Er namysy - el namysy» jınaqtary, K.Tábeıdiń «Muzda janǵan alaý», T.Beıisqulovtyń «Jeltoqsan yzǵary» kitaptary jaryq kórdi. «Allajar», «Qyzǵysh qus» kınofılmderi túsirildi. 2006 jyly M.Shahanovtyń «Jeltoqsan epopeıasy» atty kólemdi kitaby basylyp shyqty.