Bizdiń elimizdegi aqyly jol ázirge «Astana-SHýchınsk» baǵytyndaǵy avtoban ǵana. Sheteldikter salǵan soń ba, obaly neshik, bul jol jaz kúnderi áli jaqsy. Eki jaqqa da ketetin úsh jolaq - baǵasyn bilgen adamǵa tamasha. Alaıda osy jolmen qalaı júrýdi bilmeıtinder kóp. Oń jaqtaǵy jol - jyldamdyǵy aqyrynyraq avtobýs pen júk mashınalaryna, ortańǵy jol júırik jeńil mashınalarǵa, sol jaqtaǵy jolaq basyp ozatyndarǵa arnalyp, únemi bos bolýy kerek ekenin bilmeıtinder osy úsheýine kezek shyǵyp, qaı jolaq bos bolsa sonymen júrip, apatty jaǵdaı týdyryp jatady.

Eki jyldan beri aqyly bolǵan ondaǵy jol júrý erejesi jaqsara túsip, tazalyǵy arta túsýi kerek edi. Ókinishke qaraı kerisinshe bolyp tur. Májilis depýtaty Aıqyn Qońyrovtyń aıtýyna qaraǵanda onda meteorologıalyq jaǵdaı nasharlaǵan kezde jol apattary kóbeıip, adam shyǵynyna jol berý jıi oryn alyp tur. Onyń bir sebebin depýtat «Qazavtojol» Ulttyq kompanıasynyń osy jolǵa qojalyq etetin «Aqyly avtomobıl joldary dıreksıasy» dep atalatyn fılıalynyń jumys salǵyrttyǵynan kóredi. Atalmysh kásiporyn ózderiniń saıtynda aqy alýdyń sharttaryn egjeı-tegjeıli jazyp, sonyń ishinde tipti apat bolǵanda jol jıegindegi múlikterine zaqym kelgen bolsa, qosymsha aqy alýdy eskertkenimen ózderiniń basty mindeti – qysy-jazy joldyń tazalyǵyn saqtaýdy kórsetýdi «umytyp» ketipti. Jol apatynyń ózi negizinen joldy qar basyp qalýy men tuz sebilmegen muzdaqtyń (kóktaıǵaqtyń) kesirinen bolyp jatqan joq pa? Esi-dertin aqy alý ǵana teskender ony kórgileri kelmeıdi eken...

 Osy máselelerdi A.Qońyrov bastaǵan Májilis depýtattary Premer-Mınıstr B.Saǵyntaevqa bildirip, aqyly joldyń tazalyǵyn qamtamasyz etý kerektigin eskertti. Premer qolǵa alsa bálkı, aqyly joldyń qaýipsizdigi arta túser degen úmit bar.

S.ELEÝ, sarapshy.