Qarlyǵash Ábdirahmanova esimdi «ana» óziniń 2 jastaǵy qyzyn 30 myń teńgege satpaqshy bolǵan dep habarlaıdy ktk.kz. Polısıa qyzmetkerleri qyzyn saýdalap turǵan jerinen túsip, ony tutqyndaǵan. Budan buryn ol qyzyn 2 márte balalar úıine ótkizbekshi bolǵany belgili boldy. Qarlyǵash Ábdirahmanovanyń psıhıkalyq jaǵdaıyna saraptama jasalyp, onyń óz is-áreketterine jaýap bere almaıdy degen qorytyndy jasalǵan. Qazir 22 jastaǵy kelinshek psıhdıspanserde emdelip jatyr. Al onyń 2 jasar qyzy Gúlim jetimder úıine ornalastyryldy. Gúlimniń týystary qyzdy jetimder úıinen alyp ketý úshin, qujattardy daıyndap jatyr.

Qazaqstanda tastandy balalardyń sany artyp keledi. Balasyn aıaýsyz sabap, qoqysqa, dárethanaǵa, qystyń kúni dalaǵa tastap ketip jatqan bezbúırek analar týraly jıi estıtin boldyq. Jańa týylǵan sábıdi qoqysta tastap ketetinderdiń qatary kóbeıip ketkendikten  2014 jyly beıbı-boks konteınerlerin ornatý týraly sheshim qabyldanǵan. Ol 2015 jyly qolǵa alynýy kerek edi. Alaıda, áleýmettik zertteý barysynda, beıbı-bokstardy ornatqan elderde tastandy balardyń sany eki esege artqany anyqtaldy. Sondyqtan ol Qazaqstanda ornatylmaıtyn boldy.