Iraktyq áskerıler Btý Allamı men Naıef Hrebıd bir-birin Iraktaǵy soǵysta kezdestirdi. 12 jyldan keıin ekeýi birge tura bastady.
2003 jyly Naıef Hrebıd amerıkalyq áskerge aýdarmashy bolyp jumysqa kirdi.
«Biz Ramadadaǵy páterge ornalastyryldyq. Sol ýaqytta odan jaman jer bolmaǵan shyǵar. Adam ólimi, atys, jarylys. Men únemi ózimnen «Bul jerde ne istep júrmin?» dep suraıtynmyn. Osyndaı suryqsyz kúnderdiń birinde bir jigitti kórdim. Onyń qara kózderi ot shashyp, kúlimdep turdy. İshteı «Qandaı súıkimdi jigit» dep oıladym. Jan túrshigerlik jerden ǵajaıypty tapqandaı boldym» deıdi áskerı aýdarmashy.
Hrebıd basqa er adamdardan ózgeshe ekenin eshkimge tis jaryp aıtpady. Irakta bir jynysty nekege qatań tyıym salynǵan. Al qyztekeler zorlyqtyń qurbany bolatyn jaǵdaılar jıi kezdesedi.
Naıef Hrebıd sol kezdesý kezinde Btý Allamıdiń de ony unatqanyn bilmedi.
«Men de birtúrli sezim boldy. Ómir boıy tek sol adamdy izdegendeımin. Kúnnen kúnge oǵan degen sezimim kúsheıe berdi» deıdi Allamı.
Jaqyn tanysýǵa múmkindik ortaq operasıa kezinde paıda boldy. Ekeýi birge tamaqtanýǵa baryp, bir-birine degen sezimderi kúsheıi túsken.
Úsh kún ótkennen keıin Hrebıd pen Allamı bir-birine sezimderin aıtty.
«Men onymen erekshe jaqyndyqty baıqadym. Hrebıd meni súıip aldy da, birden ketip qaldy. Osydan keıin úsh kún boıy tamaq jeı almadym» deıdi Allamı.
Surapyl soǵystaǵy mahabbat
Áskerı lagerdegi eki jigit ýaqytty birge ótkize bastady. Muny amerıkandyq áskerıler de, ırandyq áskerıler de baıqady.
«Men amerıkandyq kapıtanǵa Btý týraly aıtyp berip edim, ony men júrgen amerıkandyq lagerge ornalastyryp berdi. Biraq meniń qyzteke ekenimdi basqa jigitter bilgennen keıin menimen aralaspaı qoıdy. Tipti jerlesim úlken taıaqpen uryp, qolymdy syndyrǵan kezderi de boldy» deıdi aýdarmashy.
2009 jyly Hrebıd AQSH-tan baspana surady. Sebebi amerıkandyqtarmen uzaq jumys istegennen keıin týǵan elde qalý qaýipti boldy.
Hrebıd bosqyn statýsyn alyp, Sıelette de turaqtady. Alaıda Allamıǵa vıza alyp berý áreketterinen túk shyqpady. Allamıdiń otbasy onyń qyzteke ekenin bilip, ony áıel alýǵa májbúrleı bastady. Hrebıdtiń tanysy, Sıetldaǵy shirkeýde ýaǵyzshy qyzmetin atqaratyn Maıkl Faıl Allamıdyń Beırýtqa qashyp ketýine kómektesti.
«Mundaı sheshim qabyldaý maǵan ońaıǵa soqpady. Men 25 jylǵy armıamen kelisim-shartqa otyrǵanmyn. Sonymen qatar, otbasynda tek men ǵana jumys istedim. Alaıda Hrebıdpen birge bolǵym keldi» deıdi Allamı.
Iraktaǵy qyztekeler
Irakta erekshe qarym-qatynastaǵy adamdarǵa jaýgershilik kózqaraspen qaraıdy. Olardy óltirip ketken jaǵdaılar jıi oryn alady. 2012 jyly júrgizilgen zertteýge sáıkes gomoseksýalısterdi kóbine quqyqqorǵaý organdary qýdalaıdy eken. DAISH terorıstik tobynyń erekshe adamdarǵa degen kózqarasy óte qatal. Ondaı adamdardy bıik ǵımarattardan laqtyrǵan jaǵdaılar da bolǵan.
Allamı men Hrebıd osy jaǵdaılar óz basynda qaıtalanbaýy úshin qoldarynan kelgenshe tyrysty.
Ekeýi kúnde skaıp arqyly sóılesip otyrǵan. Allamı birneshe márte BUU joǵarǵy komısarynyń bosqyndar isi jónindegi basqarmasyna jumysqa turý aldyndaǵy suhbat júrgizýge shaqyryldy. Alaıda ár kezde túrli kedergilerge tap boldy. Osy kezde Maıkl Faıl qaıtadan kómekke keldi. Allamı ony kindik ákem dep ataıdy eken.
Allamı 2013 jyly Kanadaǵa jumysqa ornalasty. Qos ǵashyqty 225 shaqyrym jer bólip turdy. Hrebıd ár demalysta mahabbatyna qonaqqa baryp turdy.
2014 jyly 14 aqpanda ekeýi Kanadada nekesin tirkedi. Osydan keıin Hrebıd zańdy jubaıyna amerıkandyq vıza berýdi surady. Bir jyldan keıin AQSH-tyń Monrealdaǵy kóshi-qon qyzmeti qos ǵashyqty suhbattasýǵa shaqyrdy.
«Ushaqta 7 saǵat ushtyq. Dalada 27 gradýs sýyq» dep eske alady Hrebıd. «Bizge eki, úsh suraq qoıyp, 10 mınýttan keıin Btýǵa «Amerıka Qurama Shtatynda turýǵa ruqsat etildi» dep jaýap berdi».
«Men qýanǵannan aıqaılap jibere jazdadym. Shyqqannan keıin jylap jiberdim. Baqyttan basym aınalyp, tula boıym dirildep ketti! Biz basynda armandaǵanymyzdaı birge turatyn boldyq».
2015 jyly naýryz aıynda Herbıd pen Allamı Vankýverden Sıetlge avtobýspen kóshti. Olar nekelerin resmı túrde Vashıngtonda tirkep, dúrkiretip toı jasady.
«Birinshe ret nekemizdi tirkegende toı jasamadyq. Al biz ertegideı toı jasaýdy armandadyq. Bul meniń ómirimdegi eń baqytty kún boldy» deıdi Hrebıd.
Qazir olar Sıetlde turady. Hrebıd amerıkandyq azamattyqty alyp, menedjer bolyp jergilikti kompanıada jumys isteıdi. Allamı grınkarta aldy. Bolashaqta AQSH azamattyǵyn alýy kerek. Ázirshe qurylysshy retinde jumys isteıdi.
Olardyń mahabbat hıkaıasy týraly derekti fılm de túsirildi. 2016 jyly Los-Anjeles festıvalinde «Iraktan» fılminiń premerasy boldy.
«Endi bizge jasyrynýdyń qajeti joq. Kóshede kele jatqanda men onyń qolynan ustaı alamyn» deıdi Hrebıd.
Onyń jubaıy otbasyn quryp, burynǵydaı ózderin qorǵansyz sezinbeıtinin jetkizdi.
Qazaqstanda bir jynysty nekege ruqsat joq. Qoǵam da tabıǵatqa qarsy kelgen adamdardy qabyldamaıdy. Qazaqstandaǵy dástúrli Islam dininde bir jynystylardyń mahabbaty úlken kúná bolyp esepteledi. Mamandar muny psıhologıalyq aýytqýshylyq ekenin aıtady. Eń soraqysy elin, jerin qorǵap, otbasyn quryp, urpaq jalǵastyratyn er azamattardyń arasynda qyztekeler kóbeıip keledi. Tabıǵat zańyna moıynsunbaǵandardyń dúnıetanymyna naqty ne áser etetinin ǵalymdar taba almaı keledi.
Derekkóz: bbc.com
