Almaty qalalyq soty Birtutas zeınetaqy jınaqtaý qory (BZJQ) basshylarynyń tutqyndalý sebebi «Býzgýl Aýrým» kompanıasynyń oblıgasıalaryn satyp alýǵa baılanysty ekenin jarıalady. Ulttyq bank bul qarajat qordyń óz aktıvi esebinen bólingenin, salymshylardyń aqshasy ornynda ekenin aıtyp aqtaldy. Aý, sonda mıllıardtaǵan soma qordyń ákimshiligine qaıdan keldi? Olar salymshylardyń aqshasyn, ıaǵnı halyqtyń aqshasyn aınaldyrýdan tabylǵan tabys emes pe? Qor ákimshiligi men Qor ekeýi eki basqa zańdy tulǵa bolatyn bolsa, barsha qazaqstandyqtardyń bul kúni trıllıonnan asqan salymy ıesiz eken-aý, onyń aqshasyn aınaldyryp, Qorǵa tabys túsirýge tıisti ákimshilik ózine tabys taba beredi eken-aý?
Májilistegi Qazaqstannyń halyqtyq komýnıseri partıasynyń fraksıasy atynan depýtat Aıqyn Qońyrov premer-mınıstr B.Saǵyntaev pen Ulttyq bank tóraǵasy D.Aqyshevke depýtattyq saýal joldap, mundaıdyń ádiletsizdik ekenin jetkizdi. Qor aqshasynyń aınalýynan túsken tabystyń bári onyń óz qambasyn tolyqtyrýy kerek degen saýalda.
«Qazaqstan Respýblıkasynda zeınetaqymen qamtamasyz etý týraly» Zańda Zeınetaqy qorynyń aktıvin aınaldyrýdan tabylǵan túsimniń qaıda ketip, qalaı jumsalatyny da kórsetilmegen. Eger osy zańda másele naqtylanǵan bolsa Basqarý ákimshiligi tabysty ózine paıdalanbas edi. Sonymen qatar qor Ákimshiligi aı saıyn barlyq zeınetaqy aktıviniń 0,025% kóleminde syıaqy alady eken. 2016 jyldyń 11 aıynda ol 14 mıllıard 622 mıllıon teńge bolypty. Osy da ádiletsiz, odan da ákimshilikti aqsha tabý emes, naqtyly eńbekaqy alatyn basqarma qylyp quryp, eńbekaqy qoryn belgilep, sodan ǵana aqy alýǵa qoıý kerek edi ǵoı. Óıtkeni, Qordyń janynan tabys tabatyn Ákimshilik bolsa ol óz qaltasynyń múddesin kóbirek oılaıdy emes pe? Depýtattyń saýalynan osyndaı oı týady.
S.ELEÝ, sarapshy
