Asa qurmetti Elbasy!

Siz irgetasyn qalaǵan modern Qazaqstandy bolashaqqa bastaıtyn sarabdal saıasatyńyzdyń birden-bir qoldaýshylary «Bilim Inovasıa» lıseıleri (QTL) ujymy men ata-analary. Alǵash qońyraýyn Ózińiz soqqan bilim ordalaryna degen yqylasyńyz ben árdaıym kórsetip júrgen qoldaýlaryńyz úshin alǵysymyz sheksiz. 

Asa mártebeli Elbasy! 

Túrkıa Respýblıkasynyń Qazaqstandaǵy tótenshe jáne ókiletti elshisi Nevzat Ýıanyktyń 2 naýryz kúngi BIL-der  týraly  málimdemesi balalarymyz ben ata-analardyń kóńiline qaıaý salyp qana qoımaı, bizdi qatty qynjyltty. Beıbitshilik pen dostyqtyń altyn dińgegi Qazaqstanda oryn alǵan bundaı arandatýshylyq, qaımaǵy buzylmaǵan qoǵamǵa iritki salyp, egemen elimizdiń ishki isine tikeleı aralasý dep sanaımyz.

Túrkıa elshisiniń bul qylyǵy osymenen ekinshi ret qaıtalanýda. Oqý jylynyń bastalar aldynda dál keshegideı málimdemesimen qoǵamdy dúrliktirgeni Ózińizge málim. 

Asa mártebeli Nursultan Ábishuly!

Bilim-Innovasıa lıseıleriniń ata-analary retinde Sizden Túrkıanyń elshisi Nevzat Ýıanyktyń bundaı orynsyz áreketterinen balalarymyzdy, bilim oshaqtaryn jáne shırek ǵasyrlyq jastyq shaǵyn Qazaqstanda ótkizgen túrkıalyq kinásiz ustazdarymyzdy qorǵaýyńyzdy suraımyz.  Óıtkeni elshiniń árbir málimdemesi bizdi qatty alańdatýmen shektelmeı, balalarymyzdyń oqý úlgerimine keri áserin tıgizip otyr. Búgingi kúnge deıin kórsetken kóshbasshylyq kóregendigińizben qorǵan bolyp, alańkóńilimizdi ornyqtyratyndyǵyńyzǵa shúbámiz joq. 

Otanymyz Qazaqstanǵa beıbit-damý, Cizge zor densaýlyq tileımiz!

Qurmetpen: «Bilim-Innovasıa» lıseıleri (QTL) ata-analar qaýymy