Túrikmenstan prezıdenti Gýrbangýly Berdymýhamedovtiń áni qyrkúıekte Ashhabadta ótetin Azıa oıyndarynyń ánuranyna aınaldy dep habarlaıdy «Qamshy» aqparattyq agenttigi «Azattyq» radıosyna silteme jasaı otyryp.

Azıa oıyndarynyń ánurany sáýirdiń 8 kúni arnaıy jınalys barysynda tańdalyndy. Avaza kýrorttyq aımaǵynda ótken konsert kezinde Berdymýhamedovtyń «Alǵa, alǵa, tek alǵa, týǵan ólkem Túrikmenstan» dep shyrqaǵan áni sol kezde sporttyq is-sharanyń ánurany retinde usynylǵan bolatyn. Konsertke qatysqan tyńdarman qaýymnyń barlyǵy usynysty bir aýyz qoldaǵan eken.

Jergilikti ulttyq BAQ Berdymýhamedovtyń ánin naǵyz patrıottyq án dep baǵalady. «Ánniń sózi men áýeni táýelsiz Túrikmenstan azamattary sezinetin maqtanysh pen baqyt sezimderin jaqsy jetkizedi» delingen BAQ-ta.

Osyǵan deıin Berdymýhamedov Ashhabadta qyrkúıektiń 17-i men 24-i aralyǵynda ótetin Azıa oıyndarynyń ánuranyna án tańdaý úshin shyǵarmashylyq baıqaý jarıalaýǵa buıryq berilgenin BAQ-ta habarlanǵan bolatyn. Alaıda baıqaý jarıalandy ma, baq synaýshysy boldy ma degen aqparat beımálim.

Bılikte júrgenine 9 jyl bolǵan Gýrbangýly Berdymýhamedov ónerin alǵash ret 2010 jyly Týrkmenbashı qalasynda pash etken bolatyn. Balalarymen akordeon aspabynda oınaǵan ol jurttyń esinde qatty qaldy. Sodan beri túrikmen prezıdenti sahnadan túsken emes.

Aýdarǵan: Jazıra Baıdaly