Indonezıa bıligi el astanasyn Djakartadan basqa qalaǵa kóshirmek. Bul týraly reactor.inform.kz jergilikti BAQ-qa silteme jasap habarlaıdy.

Bul másele kópten beri talqyǵa salynǵan bolatyn. Biraq bılik naqty isti endi ǵana qolǵa alyp otyr.

Astanaǵa laıyq-aý degen birneshe qalalar qarastyrylýda. Sonyń biri Ortalyq Kalımantan provınsıasynda ornalasqan Palankaraaıa qalasy. Nazarǵa ilikken qalalardyń bári Djakarta qalasy ornalasqan Iava aralynan tys jerde. Naqty sheshim jyl sońyna deıin qabyldanbaq.

El astanasyn aýystyrý máselesin 1945-1967 jyldary prezıdent bolǵan Sýkarno da kótergen.

Astanany aýystyrýǵa eń basty sebep halyqtyń kóptigi bolyp otyr. Qaladaǵy keptelisten kólik júrgisiz. Iava araly Indonezıa aýmaǵynyń 7% quraıdy. Al munda eldegi 245 mln halyqtyń 60% turady.

Ekinshi bir sebep Djakartanyń jaǵalaýda ornalasýy. Maýsymdyq jaýyn-shashyn kezinde sý tasqynynan zardap shegedi. Sondaı-aq qazirgi astana seısmıkalyq qaýpi joǵary jerde tur.