Kúndelikti syra iship turý adamdy júrek-qan tamyrlary aýrýynan qorǵaýy múmkin. Possıllıdaǵy Jerorta teńizi nevrologıa ınstıtýtyndaǵy ıtalán ǵalymdar osyndaı qorytyndyǵa kelgen. Bul týraly Qamshy.kz agenttigi BBC orys qyzmeti aqparatyna súıenip habarlaıdy.

Olar jasaǵan 150-den astam túrli zertteýdiń qorytyndysy Nutrition, Metabolism & Cardiovascular Diseases medısınalyq jýrnaldarynda jarıalanǵan.

Shaǵyn qumyradaǵy (330 ml) syrany kúndelikti tutyný júrek-qan tamyrlary aýrýynyń qaýpin 25%-ǵa azaıtady. Ǵalymdar kúndelikti tutynýdyń ólshemi 2 qumyradan aspaýy kerek deıdi. 

Shyndyǵynda syra júrek-qan tamyrlary aýrýynyń aldyn alýǵa oń áser etedi. Ol qandaǵy «paıdaly holesterın» deńgeıin kóteredi. Ǵalymdardyń kózqarasynsha, syra quramynda odan basqa da adam aǵzasyna paıdaly hımıalyq elementter bar.

Alaıda, bul alkogólge táýeldi adamdar jáne onkologıalyq aýrýy barlarǵa arnalmaǵan.

Syrany ólshemdi túrde tutynatyn, densaýlyǵy myqty adamdardyń bul ádetten bas tartýynyń keregi joq.

Degenmen, ǵalymdar alkogóldi ónimdi belsendi qoldaný adam aǵzasyn zaqymdaýǵa ákelip soǵatynyn eske salady.

Aıta ketsek, ǵalymdardyń bári syra tutynýǵa oń qaraı bermeıdi. Brıtan medısınalyq jýrnaly syrany ólshemdi qoldanýdyń ózi onkologıalyq aýrýǵa ákelip soǵatynyn jazǵan bolatyn.