Bir Adamnyń balasyndaı qazaq-fransýz bop bir úıde turyp jatqanymyzǵa týra toǵyz aı soǵypty. Máskeýdegi magıstratýralyq birjyldyǵymnyń boıaýyna qanyq tús berip, reńin ádemirek etisken eren azamat - Oskar degen jigit osy. Biz úshin Asqar. Ózi Fransıanyń Bordo qalasynan. Parıjdikterdi moıyndamaıdy. Emosıaǵa jurdaı, ilimge baı. Men eki ezýim eki qulaǵyma jetip kúlip jatsam, bul ernin eki mıllımetrge ǵana sozyp, salqyn sarańdyǵyna salady. Kúlkiden bir márte bolsyn dybys shyǵarǵany esimde joq. ⠀
⠀⠀⠀ ⠀⠀⠀⠀ ⠀⠀ ⠀⠀⠀⠀ ⠀⠀⠀ ⠀⠀⠀⠀⠀⠀⠀
Osyndaǵy jurtpen qurǵan saǵat-saǵat toǵyz aılyq suhbattarymnyń ushtaryn baılap, bir jiptiń boıymen sozyp kórsem, ishindegi eń sapaly kendirsiz mınýttary Asekeńmen ótken eken. Qudaı ózi pendelerindegi kemshilikterdi qasyndaǵylaryna qarap jamap alsyn deı me, áıteýir mendegi jóni túzý qasıet munyń muqtajdyǵyna jarasa, Asqardyń asyl tustaryn meniń bolmysym aýadaı qajetsinip turady. Eger aspandaǵy arasy alty sekýndtyq meteorıtterdiń qansha jaqyndassa da, janaspastan bir-birimen esh soqtyǵyspaı, tek Qudaıdyń ǵana salyp bergen dál baǵytymen ushatynyn eskersek, myna jigittiń men túsken jataqhanaǵa at basyn baılap, jolynyń qaı-qaıdaǵy Kýbalyq Salvadormen emes, Tarazdyq Aıdarmen túıiskeni ájepteýir qubylys bolsa kerek. Tanysqan saǵatta-aq bilgenim - bul Qudaıǵa senbeıtin bolyp shyqty. Biraq qurandy fransýzshadan oqıdy. Paıǵambary - Nısshe, biraq Muhammedtiń(s.ǵ.s.) ómirbaıanyn medrese taýysqan talapty tálipten kóp biledi. Dini-dáleldi ǵylym eken. Mynany estigen kezde, áli esimde: ''eee'' dep qalǵam, kóse ıegimdi asyqpaı sıpap. Keıin baqsam, júrisi men turysynyń bári naǵyz súnnetpen somdalǵandaı kórindi. Súnnet degende qalaı: hadıs ilimin jaqsylap zerttep, paıdaly tustarynyń barlyǵyn kúndelikti qareketterine qoldanyp júr da. Sóıtsem, munyń paıymynsha, paıǵambardan aqyldy adam bolmaǵan. Qalaı júrip, qalaı sóılep, qalaı uıyqtaý kerek? - jaýaptary hadısterinde áldeqashan jazylyp qoıǵan. Sol aqyldylyǵyna bola erýshileri kóp bolǵan. Degenmen, Qudaı bar, jáne onyń arnaıy jurtqa jibergen elshisine áfısıálná ımam etpeımin,-deıdi. Tek tarıhı qaıtalanbas genıligine ǵana sájde etem dep, kishkene jibitińkirep keltirdi, musylmandy renjitpeıin dedi mee, múmkin. ''Eeee...''- dep, baıaǵysynsha ıegimdi taǵy bir sıpadym.⠀⠀⠀⠀⠀⠀⠀⠀⠀ ⠀⠀⠀⠀⠀⠀⠀⠀⠀⠀⠀ ⠀⠀⠀⠀⠀⠀⠀⠀⠀⠀⠀
⠀⠀⠀⠀
Sóıtip júrgende bir aı boıy aýyz bekitti. Qyzyq, á. Qatyp qalǵan ateısiń onysy nes?-dersiz. Qarashada, deı turǵanmen. Ol kórshimniń oıynsha, bastysy paıǵambar (s.ǵ.s.) jasaǵan rıtýal oryndalsa boldy, paıdasy bar. Demek, árbir aqyly bar adam amal etýge umytylýy tıis eken. Sol yjdahattylyqtyń yrqymen tańǵy jetilerde turyp, sáresin qamdaıdy da, tyńqıyp alyp qylýetine kirip ketedi. Saǵat tili keshki týra toǵyzǵa tirelgende ǵana kerilip bólmesinen shyǵady. Kúni boıy as úıge aıaq baspaı, qylýetinde qamalyp ap oqyǵan kitabyn jeńin túrip turyp aıtyp berýge kirisedi. Solaı qarashany jıyrma kitappen taýysty. Ýnıverge jóndi de barmady. Keıinirek úıip tapsyra saldy-aý, shamasy. Aıtaıyn degenim jylyna bir márte osylaı aýyz bekitip turýdy qaperinen tastamaıdy.⠀⠀⠀⠀⠀ ⠀⠀⠀⠀⠀⠀⠀⠀⠀⠀⠀⠀⠀⠀⠀⠀⠀
Qazir taım-menedjmentin hadısterdiń negizinde týralap júr. Qaıtedi? Bylaı: Kún batysymen tamaqtanyp alyp, tórt-bes saǵat tynyǵady. Túnniń alǵashqy eki bóligin uıqymen ótkizip, úshinshisinde úı jumysyn jasaýǵa turady. Kún qulanıekteı kóterilisimen (saǵat 11:00-de) tas tóbeden asqansha bir-eki saǵat taǵy myzǵyp alady. Eger bul ýaqytty uıqyǵa ıgere almaı qalsa, besin namazynyń kirer kezinen bastap 40 mınýt kóz iledi. Namazdyń ýaqyttaryn osy úshin azdap meńgerip alǵan. Nege qyryq qana mınýt, sen túnde tórt-bes saǵattaı-aq demaldyń emes pe?-deseń, ''Muhammed(s.ǵ.s) degen aqylman bul ýaqytta ''odan artyq uıyqtaǵannyń mıǵa zıany shash etekten'' ekendigin eskertken,-dep shala musylmandyǵyńnan bir qoıady. Sosyn, aldyndaǵy ıegińdi sıpaǵan qolyńmen basyńdy qasyp qalasyń. Odan bólek qyrǵyn hadısteri bar turaqty ǵadetine aınaldyryp júrgen. Tizip jaza berýge bolady, ony oqyp, qyzyǵyp jatqan kim bar, biraq. Óz basym, senimin jaqtyrmasam da, sáýleli sózin, sosyn kópke uqsamaıtyn ózin qatty jaratyp keldim. Musylman bolsa, myqty musylman bolar ma ed? ⠀⠀⠀⠀ ⠀ ⠀⠀⠀⠀⠀ ⠀⠀⠀⠀⠀ ⠀⠀ ⠀⠀⠀⠀⠀⠀⠀
⠀⠀⠀⠀
Búgin Asqardy kórmegenie eki kún boldy. Týǵan jerine qaıtyp ketken. Esterınızde me? Bala kezimizde úıge alystan jaqyn týystarymyz, ıa dostarymyz kelip, birneshe kún boıy bala kóńilmen uzaq oınap, al oıynnyń qyzyǵyna batqanda kóńildi qulazytyp, qaıta úılerine qaıtyp ketýshi edi ǵoı. Sol sátte ishińdegi kóńildiń keńistigi qańyrap qalatyn. Birge oınaǵan oıynshyqtar shashylǵan boıy qozǵalyssyz qalady. Olar joq. Al, sen basyń salbyrap, jalǵyz óziiń birtúrli kúıde qalǵan-qutqan oıynshyqtardy jınastyryp júresiń úıde. Sol sıaqty, kesheden beri kórshimdi úıden kórmedim. Bólmesi typ-tynysh. Ózi joq. Qulazyp otyrmyn. Jalpy jaman eken jataqhanada jalǵyz qalý degen. Erterek elime jetip alsam jarar edi.
Aıdar MYRZABEK
Feısbýktegi jeke paraqshasynan alynǵan
