Búgin «Astana EKSPO-2017» ulttyq kompanıasynyń basshylyǵy kórme aımaǵyndaǵy tamaqtardyń baǵasyn retteý máselesin túsindirip berdi, dep xabarlaıdy QazAqparat.

Kommersıalızasıa jónindegi departament dırektory Dáýlet Erkimbaevtyń aıtýynsha, kompanıa basshylyǵy meıramxana, dámxana men fast-fýd sıaqty qoǵamdyq tamaqtaný oryndaryn ashý arqyly xalyqtyń barlyq toptaryna tıimdi baǵanyń bolǵanyn kózdegen. «Máselen, qoǵamdyq tamaqtaný dúńgirshekterinde bir túski astyń baǵasy - 1 400 teńge. Ol qalanyń ortasha baǵasyna sáıkes keledi. Sebebi Astanadaǵy oıyn-saýyq ortalyqtarynda da túski astyń baǵasy sondaı. Al kórme aımaǵyndaǵy dámxanalar men meıramxanalarda túski astyń ortasha baǵasy - 7 500 myń teńge. Ol da - Astana sıaqty megapolısterdiń ortasha baǵasy», - deıdi Erkimbaev.

Sondaı-aq, ol buǵan deıin ǵalamtorda keńinen talqylanǵan «Toıqazanı atty ulttyq taǵamdar meıramxanasynyń baǵalaryna túsinik berdi. «Shynymen de, ol - qymbat meıramxana. Sebebi tamaqtyń dámi de, qyzmettiń kórsetý sapasy da joǵary. Negizi, biz bir ulttyq taǵam úshin birneshe oryndy qarastyrdyq. Máselen, meıramxanada qymbat bolsa, fýd-korttarda qazaqtyń ulttyq taǵamdaryn bir-eki myń teńgege alyp jeýge bolady. Sol sıaqty kıoskilerde qazaqy ettiń bir porsıasyn 1 200 teńgege satyp alýǵa múmkindik bar. Sondyqtan qoǵamdyq tamaqtaný oryndarynyń baǵasy bir meıramxanaǵa tirelip turǵan joq. Osyny túsiný qajet», - dep atap kórsetti departament basshysy.

Onyń aıtýynsha, kórme aımaǵynda 25 dámxana men meıramxana jumys isteıdi. Ol jerde 15 ulttyń taǵamdaryn jep kórýge bolady. Budan bólek, fast-fýd ónimderi satylatyn 33 shaǵyn kıoskiler bar. Oǵan qosa, keıbir ulttyq pavılondar óz ǵımaratynda tamaqtaný oryndaryn ashty.