El bolyp eńse kóterip, ult pen ulystyń basyn qosyp, jóni oń jurt bolýǵa tyrysyp kele jatqanymyzǵa mine 25 jyldan asty! Azattyqtyń áýelgi  jyldarynda halyqtyń jaǵdaıy shalaqursaq keıipte bolsa, búginde buqara  jaǵdaıy aýyz toltyryp aıtarlyqtaı deńgeıde. Tunyǵy taza birligimiz ben yntymaqtastyǵymyzdyń shyrqyn qashyrǵysy keletin, atynan at úrkıtin radıkaldy dinı aǵymdar men toptar qoǵam arasynda júr. Qatarlary kóbeıip órship te bara jatyr edi, abyroı bolǵanda, atqaminer azamattar men bılik ókilderi atalmysh jaǵdaıdy der kezinde qolǵa alyp, tıisinshe sheshim qabyldap, ony júzege asyrýǵa kiristi. Bir ǵana bizdiń oblysymyzdyń ózinde din keleńsizdikterimen İshki ister departamenti, Ulttyq qaýipsizdik komıteti, Jambyl oblysy ákimdiginiń din isteri basqarmasy men oblystyq prokýratýra aınalysýda, tipti bul baǵytta meshit ımamdary da aıanyp jatqan joq. Dese de eski daýdyń daýyly seıiler emes. Teris aǵymǵa bet buryp, dindi fanattyq deńgeıde ustanyp, azamattar arasynda alaýyzdyq  týǵyzatyn ıdeologıany ustanýshylar áli de bar. Barshaǵa aıdan anyq bolyp turǵan aqıqatty aınyǵan dep bósip júrgenderdiń deni jastar, olar din mamandary tarapynan aıtylǵan keńes pen aqparattardy joqqa shyǵaryp, teolog dintanýshylardyń bárin bıdǵatshy(dinde jańalyq ashýshy), munafyq(ekijúzdi) dep jón-josyqsyz aıyptaýǵa kóshken. Jasyratyny joq, elge zıany bar kóptegen teris dinı aǵymdar ıslam dininiń negizinde órbip otyr, sebebi, halyq sanynyń negizgi bóligi musylmandar. Jat aǵymnyń jetegindegi jandardyń kóbi zańǵa tolyq baǵynbaıdy, zańdy dinı birlestik usynǵan baǵytty ustanbaıdy, kókirek janarlary kór, qulaǵy biteý, basty maqsattary búlik shyǵarý. Árıne, olar ózderiniń ustanymdaryn aqıqatqa balap, talas-tartys jasaǵysy keletindiginen beısana keıipte, ózderiniń áreketterine jaýap bere almaıdy.

Syrt beınesi qoǵamǵa jat, tól dástúri men salt-sanasyn shetke ysyryp tastaǵan, kózqarasy belgili bir deńgeıde shektelgen, rýhanı quldyraýǵa aınalǵan azamattarmen búginde Jambyl oblysy ákimdigi Ońaltý ortalyǵynyń qyzmetkerleri aınalysyp kele jatyr. 2016 jyldyń qazanynda qurylǵan bul Ortalyq jat aǵymnyń jeteginde ketkender jáne sol aǵymnan zardap shekkendermen tikeleı, ári, keshendi túrde jumys jasaıdy. Sondaı aq, mekemeniń enshisine jalpylama aqparattyq-túsindirý sharalaryn júrgizý de kiredi.  Desek te, negizgi qyzmet dinı kózqarasy burys bar azamattarmen jeke suhbat júrgizý, aǵymyn anyqtap, dástúrli dindi túsindirý. Olardy ózderiniń kóptep shoǵyrlanatyn jerlerinen (óndiris oryndary, meshitter) taýyp, tıisinshe zań sheńberinen aýytqymaı suhbat ótkizilip, mekeme ınspektorlary tarapynan baqylaýǵa alynady. Ortalyq quramynda dintanýshy, teolog jáne psıholog mamandary bar. Jeke kezdesýler azamattardyń dinı kózqarasynyń deńgeıine qaraı júıeli túrde júrgiziledi. Oblys kólemindegi ár-bir dini burmalanǵandar jáne dininiń mini shyǵyp opyq jegender «Ońaltý ortalyǵynyń» basty nazarynda!

Tektilerden qalǵan teńdessiz salt-sanamyz ben qoınaýy qorǵa baı keń baıtaq dalamyz qazirde sol jerdi basyp júrgenderge amanat ekeni anyq. Ejelden kele jatqan dáripteletin dástúrimiz ben ustanatuǵyn ata dinimizdiń murtyn buzbaı keleshek urpaqqa qaldyrý da bizdiń mindetimiz. Osyndaı uly maqsattarǵa jetý jolynda, el tutastyǵy men ishki birligin saqtap qalý barysynda «Ońaltý ortalyǵynyń» aldaǵy ýaqytta qosar úlesi teńizdeıin telegeı bolmaq. Endigi sátte soqpaq joldy tańdadym dep toqpaqqa jaqyn júrgenderdi, ámiri jetse soıyl ustap, sodyrǵa aınalýǵa daıyn turǵandardyń sanasyn sergitip qalypty qoǵam qataryna qaıtarý basty paryz!..

  B.Tileýhan

Jambyl oblysy ákimdigi
«Ońaltý ortalyǵy» KMM-niń
ınspektor–psıhologi