Aqtóbe oblysy, Baıǵanın aýdany, Altaı batyr aýylynda 22 jastaǵy Serikbolsyn Kósherbaı bas-mı jaraqatyn alyp, ol sanavıasıamen qalaǵa jetkizildi. Birneshe kúnnen soń kóz jumǵan naýqastyń qos búıregi kezekte turǵan eki aqtóbelikke salynǵan bolatyn. Búgin jas jigittiń týystary dáriger esh ruqsat suraǵan joq dep quqyq qorǵaý organdaryna aryz jazdy, dep habarlaıdy Qamshy qparattyq agenttigi QazAqparatqa silteme jasap.

27 mamyrda Serikbolsyn Kósherbaı toıǵa qatysyp, sol jerde bireý ony basynan urǵan. Bas-mı jaraqaty aýyr naýqasqa oblys ortalyǵynan sanavıasıa jiberildi. Dárigerler 22 jastaǵy jas jigittiń bas-mı jaraqatyna Baıǵanın aýdandyq aýrýhanasynda ota jasap, keıin ony Aqtóbe oblystyq aýrýhanasyna tasymaldady. Sol jerde em qabyldaǵan naýqas birer kúnnen soń kóz jumdy.

«Serikbolsyn Kósherbaı soqqy alyp, aýrýhanada jatqan kezde bári de sol jerde júrdi. Al kóz jumyp, máıithanadan denesin alýǵa barǵanda bizge «balanyń eki búıregin aldy» dep bir qyzmetker aıtty. «Sýdyń da suraýy bar» emes pe? Búıregin alar kezde bizden nege ruqsat suramaǵan? Dárigerler qylmys jasap otyr. Serikbolsyn anasyn baǵyp, soǵan qamqor bolyp otyrǵan ul. Aǵasy jumysta, qaryndasy stýdent. Ózi aýylda júrdi, úı sharýashylyǵynda edi. Minezi jaısyń, syıly adam boldy. Ol ishimdik ishpedi, temeki shekpedi. Júregi men baýyry da joq dep jatyr. Biz endi anyq-qanyǵynyna kóz jetkizgimiz keledi»,- dedi Serikbolsyn Kósherbaıdyń naǵashy apasy Gúlaıym Esenbaeva.

Bul jaǵdaı Baıǵanın aýdany, Altaı batyr aýylynda turatyn Serikbolsyn Kósherbaıdyń otbasyna aýyr tıdi. Aǵasyn joqtap otyrǵan qaryndasy Baldáýren Nurlybaeva dárigerlerdiń «ruqsat aldyq» degen sózine renishin bildirdi.

«Ákem erte kóz jumyp, anamyzdyń janynda aǵam Serikbolsyn boldy. Ol óte jaqsy, aýylǵa syıly edi. Bas-mı jaraqatymen aýrýhanaǵa túsken kezde biz kúnde baryp, dárigerlermen telefon arqyly sóılesip otyrdyq. Sońǵy ret sóıleskende, «esh ózgeris joq, qan quıyp jatyrmyz» degen bolatyn. Qaıtys bolǵan soń máıithanadaǵy qyzmetkerler onyń qos búıregi alynǵanyn aıtty. Dárigerler, aǵamnyń búıregin alǵan naýqastar, bári de keshirim surasyn dep talap qoıamyz. Áli kúnge deıin bir adam kelip, bizben sóılespedi»,- dedi Baldáýren Nurlybaeva.

Bul otbasy mán-jaıdy anyqtaý úshin quqyq qorǵaý organdaryna aryz jazyp, sotqa shaǵym túsirdi.

«Aqtóbege ákelingen Serikbolsyn Kósherbaı jansaqtaý bóliminde jatqan. Dárigerlerdiń emi nátıje bermeı, naýqas qaıtys bolǵan.  Em-dom jasalyp jatqan kezde S.Kósherbaıdyń týǵan-týystary sol aýrýhananyń janynda júrgen, únemi jaǵdaıyn bilip otyrǵan. Jas jigit qaıtys bolǵannan keıin denesin alýǵa máıithanaǵa barǵan kezde «eki búıregin alyp, basqa naýqasqa saldyq» dep aıtqan. Sol kúnnen bastap týysqandary narazylyqtaryn bildirip, quqyq qorǵaý organdaryna shaǵymdandy. «Halyqtyń densaýlyǵy jáne densaýlyq saqtaý júıesi týraly» Zańy boıynsha «máıittiń ishki organdaryn alý úshin jaqyndarynyń, zańdy ókilderiniń ruqsaty qajet» dep. Ruqsaty bolmasa, dárigerler ruqsat bermeıtinin bilse, ishki organdardy alýǵa bolmaıdy. Densaýlyq saqtaý mınıstriniń de buıryǵy bar. Onda ishki organdardy alý úshin jaqyndarynyń, zańdy ókilderiniń kelisimin alý kerek ekeni jazylǵan. Bul jerde densaýlyq saqtaý salasynyń mamandary durys jasamaǵan. Qazir oblystyq prokýratýraǵa aryz berildi. «Aqtóbe» gazetinde oblystyq bas hırýrgi suhbat bergen eken. Onda hırýrg «qaıtys bolǵan jigittiń ishki organdaryn alý úshin biz onyń jaqyn týysqandarymen sóılesip, ruqsatyn aldyq» dep málimdegen. Týǵan-týystary narazylyǵyn bildirdi. «Biz ruqsat bergen joqpyz» dedi. Osy aqparat boıynsha azamattyq sotqa shaǵym túsirdik. Prokýratýra, ishki ister organdarynan kináli adamdardy taýyp, qylmystyq jaýapkershilikke tartýdy surap otyr»,- dedi qorǵaýshy Qatarbaı Raısov.

Bul oqıǵa týraly oblystyq densaýlyq saqtaý basqarmasy habardar.

«Eger adam tiri kezinde «men donor bolmaımyn» degen qaǵaz qaldyrmasa, dene múshesi saý bolsa ony alyp, suraýsyz muqtaj adamdarǵa aýystyrý operasıasyn jasaı alamyz. Dál osyndaı jaǵdaı bizde boldy. Týǵan-týystary jaqyn jerde bolmaǵan. Al dene múshelerin tez alyp, salý kerek boldy. Aýystyrǵan kezde, basqa adamǵa salǵanda dene múshesi jumysyn jasap ketýi úshin operasıa shuǵyl jasalady», - dedi  oblystyq densaýlyq saqtaý basqarmasynyń basshysy Áset Qalıev.