Bul týraly RF Prezıdenti janyndaǵy kásipkerlerdiń  quqyǵyn qorǵaý jónindegi ýákil Borıs Tıtov «Atameken» QR UKP-nyń IV Sezinde habarlady

Qazaqstanda shyn máninde bıznes júrgizý úshin qolaıly jaǵdaılar jasalǵandyǵyn reseılik bıznes-ombýdsmen atap aıtty. Onyń aıtýynsha, qurylǵanyna bir jarym jyl ǵana bolǵan Ýákildiń ınstıtýty óziniń tıimdiligin dáleldep úlgerdi.

«Árıne, biz osy ınstıtýtty qurýdy qoldadyq. Búginde Bolat Ábilqasymulymen ózara tyǵyz qarym-qatynas ornatyp, bir-birimizden úırenýdemiz. Qazirdiń ózinde oń ózgerister bar. Birlese otyryp qaralǵan ótinishter sany ázirge onsha kóp emes, nebári onshaqty ótinish.  Olar, negizinen, Reseı aýmaǵynda kásipkerlerdiń quqyǵy buzylýyna baılanysty. Biraq bul quqyq buzýshylyqtar memlekettik organ tarapynan emes, kásipkerlerdiń óz arasyndaǵy máseleler.   Bul jerde seriktesti muqıat tańdańyzdar degen keńes bergimiz keledi», - dedi Borıs Tıtov.

Tıtov ózi atap ótkendeı, ol Qazaqstannyń júrgizip otyrǵan saıasatyna «qyzyǵa da, qyzǵana» qaraıdy eken. Bul negizinen salyq júıesi, tarıftik saıasat jáne eń bastysy bıliktiń kásipkerlikti qoldaýdaǵy belsendiligi.

«Kásipkerlerge qatysty qozǵalǵan isterdiń azaıýy aıtarlyqtaı áser qaldyrady. Reseıde biz bul kórsetkishterdi turaqtandyrýdy endi ǵana qolǵa alýdamyz. Al sizderde baqylaý-qadaǵalaý qyzmetinde jáne zańnamany izgilendirýdegi nátıjeler aıtarlyqtaı», - dep, atap ótti reseılik bıznes-ombýdsmen.

Esterińizge sala keteıik, 2016 jyly kásipkerlerdiń quqyqtaryn qorǵaý jónindegi ýákil Bolat Palymbetov jáne RF Prezıdenti janyndaǵy kásipkerlerdiń quqyǵyn qorǵaý jónindegi ýákil Borıs Tıtov  Ózara is-qımyl men yntymaqtastyq týraly memorandýmǵa qol qoıdy. Birlese otyryp sheshken ózekti máselelerdiń biri – Qostanaı oblysyndaǵy sot oryndaýshylarynyń reseılik «Tehkomplekt» kompanıasyna qatysty zańsyz áreketterine tosqaýyl qoıý boldy.