Qytaıda turatyn qazaqtardyń tarıhı otanyna kelýine túrli kedergiler jasalýda. Al elge oralyp, yqtıarhat alǵandardy sol jaqqa barǵan boıda qujattaryn tartyp alyp, keri jibermeýde eken. Almatyda baspasóz máslıhatyn ótkizgen bir top zıaly qaýym ókilderi men qandastarymyz osylaı dep bazyna aıtty. Olar Prezıdentke ashyq hat joldap, osy maýsym aıynda ótetin Dúnıejúzi qazaqtarynyń quryltaıynda osy ózekti máseleni sheship berýdi suraýda. 

Qazaqstanǵa kóship kelip, yqtıarhat alǵan nemese kóship kelgisi kelip júrgender Qytaı úkimetine jaqpaýda. Ótken jyldan beri shyǵystaǵy kórshimiz týǵan Otanyna ketkisi keletinderge talapty kúsheıtip, tipti túrli kedergiler oılap tapqan kórinedi. Sonyń saldarynan myńdaǵan qandasymyz ata-babalarynyń jerine orala almaýda eken.

«Qytaı halyq respýblıkasynda 30-40 jyl jumys istep, zeınetke shyqqan azamattar bala-shaǵasyn ertip, Qazaqstanǵa kóship kelgen. Sol Qytaıdaǵy úıleriniń barlyǵyn satyp, Qazaqstannan úı alyp, osynda qonystanyp otyrǵan azamattarymyzdy Qytaıǵa qaıtadan shaqyryp alyp, olardy otbasynan aıyryp, olardyń zeınetaqylaryn toqtatyp, tólqujattarynyń kúshin joıyp jatyr» - kásipker, azamattyq belsendi Qydyráli Orazuly.

Jalpy 25 jyldyń ishinde elimizge shetelden bir mıllıon qandasymyz kóship kelgen. Olardyń 63 paıyzy Ózbekstannan, 11 paıyzy Qytaıdan, 7 paıyzy Monǵolıadan oralǵan.. Qazirgi Qytaıda turatyn qandastarymyzdyń máselesine beı-jaı qaraı almaıtyn zıaly qaýym ókilderi Elbasyna atyna ashyq hat jazyp, arasha túsýdi suraýda.

«Bizdiń shette júrgen qazaqtarymyzdy Qazaqstanǵa alyp kelý jaıly másele kópten beri kóterilýde. Biraq sol másele aıtylǵan jerde qalady. Ásirese, sońǵy kezde ony qıyndatyp ta jiberdi» - jazýshy Dýlat Isabekov.

«Barys-kelisti tyıǵan. Qazaqtardy Qazaqstanmen araldastyrmaýda.  Vıza bermeý, bul jaqqa ótkizbeý, ótkizgen adamdardy tergeý. Nege bardyń, nege qoıdyń osy byltyrdan beri bastalypty.  Sosyn tyıym salynǵan 26 memlekettiń tizimine qosypty Qazaqstandy» - jazýshy Qabdesh Jumádilov.

Birer kúnnen keıin astanada Dúnıejúzi Qazaqtarynyń besinshi quryltaıy bastalady.  Ult janashyrlary osy ózekti máseleni quryltaıda kóterýdi kózdep otyr. 

Derekkóz: Eýrazıa arnasy