Qyrǵyz eliniń premer-mınıstri Sooranbaı Jıenbekov jınalysqa daıyndyqsyz kelgen sheneýnikke urysyp, jınalystan ursyp qýyp jiberdi, dep habarlaıdy Qamshy aqparattyq agenttigi.

«Áne, ne isterin bilmeı otyr. Qazir seni jumystan shyǵaryp jibersem, Jıenbekov meni esh negizsiz jumystan qýyp jiberdi dep aıtasyń. Qanshama qarjynyń máselesi talqylanyp otyr, nege daıyndyqpen kelmeısiń? Shyq esikten!» - dep ashýlanyp, qýyp jiberdi.

«Qurylys mamandary ózderiń jaǵdaıdyń qandaı bolyp jatqandyǵyn bilmeısińder. Uıat emes pe? Sen premer-mınıstr qatysatyn úlken jınalysqa kelip otyrsyń», - dep jalǵastyrdy sózin premer-mınıstr.

Óz áriptesteriniń kózinshe masqara bolǵan sheneýnik premer-mınıstrden keshirim surap, jaǵdaıdy túsindirmek bolǵanymen esh nátıje bolmady.

Jınalys «Eldegi kedeıshiliktiń aldyn alý» taqyrybynda ótip jatqan. Premer-mınıstr Sooranbaı Jıenbekov arhıtektýra jáne qurylys memlekettik agenttiginiń dırektor orynbasaryn Almazbek Ábdiqadyrovty qýyp jibergen.

Esterińizge sala ketsek, Sooranbaı Jıenbekov Qyrǵyzstannyń prezıdent taǵyna úmitkerlerdiń biri bolyp tabylady.  

Sholýshy: Nazerke Labıhan