Júreginde Shyraǵy bar paqyrdyń,
Ár mınýty bop elester «Aqyr kún»...
Sebebi me, saǵattary ýaqyttyń 
Syrt-syrt etip kúnin urlar ǵasyrdyń...

Sol ýaqyttyń ishinde úsh aı bar-dy,
Shenine esh shendetpeıtin aılardy.
Sol úsh aıdyń biri – Oraza.
Oraza,
Haq Allahqa quldyqtaǵy qaınar-dy.

Sol Oraza ár kúni bir, bir ǵalam,
Ár sáti onyń Haq nurymen nurlaǵan.
«Allah» degen aq quldardyń júregi,
Onda Allahyn ár sát saıyn jyrlaǵan.

Sol Oraza ishinde bir tún bar-dy,
Qarys adym attatpaıtyn jyndardy.
Jer betine órip shyǵyp sol túni,
Perishteler tyńdaıtuǵyn muń-zardy...

Saýaby bar myń aıdan da ol artyq tún – 
Qadyr túni! (Haqqa quldyqty ar tuttym!)
Qadyr túni Quran túsip Allahtan,
Júrekterge jaýǵan tún ol bar quttyń...

Qadyr túni túnderdegi tún jaryq,
Shyqqandaıyn qarańǵyny Kún jaryp.
Eki álemi jaryq Qadyr túnindeı,
Óz nápsisin óter bolsa kim jaryp!

Qadyr túni túnderdegi tún jaryq!..

Qul-Kerim Elemes