Kim aldymnan shyǵady elge barsam,
Týyp-ósken,
Túlegen jerge oralsam
Erkeleter taba almaı eki adamdy,
Basylmaıdy-aý báribir mendegi ańsar.

Elge barsam,
Basyna shyt baılaǵan,
Baıaǵydaı aldymnan shyqpaıdy anam.
Kóne qorym kózime túsken saıyn,
Kóńil bosap bozdaýyq bultqa aınalam.

Baıaǵydaı aýylda ákem de joq,
Týra sóılep synaıtyn qatemdi ójet.
Ótkelinen ótkizbeı jutty ony da,
Ólim degen - qatygez, qaterli ózek.

"Anańyzdyń qolynan dám tatyp ek,
Al, ákeńiz talaıǵa arqatirek
Bolyp edi!" - dep kórshi eske alady
Elge barsam,
...Eski úıge qorqa túnep.

Eki beıne sol sátte-aq eles berip,
Estı bergim keletin kóp estelik.
Egilgende jubanysh bola almadyń,
Eee, ómir-aı, óz balań emes pe edik?!

Ómir, ómir ótedi-aý sirá da, óstip
Birde kúlip, al birde jylap, óksip,
Kóńil senbeı kóp iske qulazıdy,
Tursadaǵy kóz kórip, qulaq estip.

Kózden emes júrekten jas monshaqtap,
Kókke qaraı beremin jasqanshaqtap.
Túbi - 
Keńdik,
Bıiktik,
Móldirlikti,
Saqtap qalsa qalady-aý aspan saqtap!

Qalqaman Sarın