Golandıanyń Amsterdam qalasy mańynda meteorıt tabyldy. Aspannan qulap túsken tas aýladaǵy saraıdyń shatyryn tesip ótken. Oqıǵadan eshkim zardap shekken joq. Bul týraly 24.kz habarlaıdy. Ǵalymdar ol Mars pen Iýpıter arasyndaǵy meteorıtter beldeýinen ushyp kelgen dep sanaıdy. Osyndaı meteorıtter el aýmaǵyna ár 3-4 jyl saıyn qulaıdy eken, biraq olardy tabý qıyn. Bul – sońǵy eki ǵasyrda Golandıada tabylǵan altynshy meteorıt. Mamandardyń aıtýynsha, atalmysh tasty zertteý Kún júıesiniń paıda bolýy týraly bilimimizdi keńeıtedi.

Geolog Leo Krıgsman bylaı dedi: - Meteorıtke qarasańyz, onda olıvınnyń shaǵyn tamshylaryn kóresiz. Osy mıneral Kún júıesi paıda bolǵanda qurylǵan. Osylaısha meteorıt Kún júıesiniń alǵashqy kúnderiniń syryn ashyp bere alady. Eń ǵajaıyby, 4,5 mlrd jyl buryn paıda bolǵan tasty qoradan taýyp, qolda ustap turmyz.