Qazaqstan men Grýzıa barlyq baǵyttar boıynsha yntymaqtastyqty nyǵaıtýdy jalǵastyryp keledi.

2017 jyly eki eldiń dıplomatıalyq qarym-qatynas ornatqanyna 25 jyl tolady, dep habarlaıdy Qamshy.kz aqparat agenttigi. 1992 jyldyń shildesinde Almatyda Grýzıanyń dıplomatıalyq mısıasy ashyldy. 2003 jyly Astanaǵa aýysty.

25 jyldyń ishinde eki el mádenı, ekonomıkalyq, saıası yntymaqtastyǵyn nyǵaıtyp keledi. Qazaqstannyń Grýzıadaǵy elshisi Ermuhamet Ertisbaev Habar arnasyna bergen suhbatynda Grýzıanyń Qazaqstan úshin mańyzdy strategıalyq seriktes ekenin aıtty.

«Jaı ǵana sandy atasaq ta bolady – Qazaqstan $340 mıllıonnan joǵary qarjyny Grýzıanyń ekonomıkasyna jumsady. Bul jerde iri ulttyq kompanıalar boı kótergen – «QazMunaıGaz», «QazTransOıl». Qazaqstannyń Grýzıada óz aktıvteri bar. Qazaqstan 49 jylǵa jalǵa alǵan Batým porty bárine málim. Biz ashyq teńizge shyǵa almaıtyndyqtan, geostrategıalyq jospar turǵysynan da Grýzıanyń Qazaqstan úshin mańyzy zor».