Irak áskeri Mosýl qalasynyń batys bóliginen sodyrlarǵa tıesili jarylǵysh shyǵaratyn zaýytty anyqtap, joıyp jiberdi. Lańkestikke qarsy jasaq ókilderiniń aıtýynsha, kásiporyn Badýsh eldi mekeninde ornalasqan, dep habarlaıdy Qamshy.kz aqparat agenttigi sheteldik BAQ málimetine súıenip. Ol jerden jarylǵysh jasaýǵa qajetti zattar jasyrylǵan qoıma tabyldy. Sonymen qatar, Irak áskeri lańkester eki apta buryn ǵana basyp alǵan aýyldy azat etti. Olar munda eski shahardan sheginip shyqqannan keıin shabýyldaǵan.

Derekterge qaraǵanda eldi mekende 700-ge jýyq terrorıst jasyrynǵan. Qaqtyǵys kezinde olardyń 300-ge jýyǵy qaza tapqan bolýy múmkin. Ázirge kóbiniń máıiti qırandy astynda jatyr.

Eske sala keteıik, Irak premer-mınıstri Haıdar Abadı Mosýldyń sodyrlardan azat etilgenin 10 shilde kúni resmı túrde málimdedi.