24 shilde Reseı pavılony alańynda Chelábınsk oblysynyń «Qoljetimdi energıa: ınfraqurylymdaǵy ınovasıa» taqyryptyq aptalyǵy bastaldy. Sharalar legin «Ýral» memlekettik bı ansambliniń konserttik baǵdarlamasy ashty. Búgin Chelábınsk oblysynyń stendi ashyldy. Onda Ońtústik Ýral energetıka salasynda, onyń ishinde balamaly kózderi týraly kompanıalar men ǵylymı uıymdardyń jobalary usynyldy.
Chelábınsk oblysynyń gýbernatory Borıs Dýbrovskıı Astanaǵa Reseı Federasıasynyń pavılonynda Chelábınsk oblysynyń kúnderiniń ashylýyna jáne «Bıznes energıasy – damý energıasy» bıznes-forýmyna qatysý maqsatynda arnaıy keldi.
-Qurmetti Borıs Aleksandrovıch, Qazaqstannyń astanasy – Astanada, EKSPO-2017 kórmesinde ózińizdi kórgenimizge qýanyshtymyz. Bizdiń halqymyzdyń, el basshylarynyń qarym-qatynasy men strategıalyq seriktestigi barlyq baǵytta qarqyndy damýda. Biz, Astana reseılik aımaqtarmen saýda, týrızm, tipti barlyq baǵytta áriptestigimizdi damytqymyz keledi. Sol sebepti EKSPO kórmesinde Chelábınsk oblysynyń aptalyǵy, kóptegen konferensıalar, dóńgelek ústelder, bıznes ókilderimen kezdesýler ótip jatyr. Biz sátti kelissózder júrgizip, birlesken jobalarymyz týraly sóılestik, - dedi qala basshysy Chelábınsk oblysy aptalyǵynyń ashylý rásiminde.
Kezdesý aıasynda taraptar eki aımaq arasyndaǵy qarym-qatynastyń basym baǵyttaryn talqylady. Tájirıbemen bólisý baǵytyndaǵy negizgi másele – SHYU men BRÚQO samıtterine daıyndalý jáne ótkizý , onyń ishinde qalalyq ınfraqurylym nysandaryna qatysty boldy. Sonymen qatar óńir basshylary Qazaqstan men Reseıdiń iri aımaqtarynda aqyldy qala júıesin engizý máselelerin saralady. Mashına qurylysy salasynda yntymaqtastyq ornatý da sóz boldy. Chelábınsk oblysy Qazaqstanǵa azyq-túlik ımporttaýdy usyndy.
Eki jaqty kelissózdiń eń mańyzdy suraqtarynyń biri aımaqtar arasyndaǵy logıstıkalyq múmkindikti ulǵaıtý boldy. Atap aıtar bolsaq, Astana-CHelábınsk áýe reısin ashý jáne «Ekaterınbýrg –Chelábınsk» Ýral jyldam magıstral qurylysyn múmkindiginshe Astanany qamtý arqyly júrgizý usynyldy.
Kelisilgen suraqtar sapaly júzege asýy úshin gýbernator men ákim birlesip, jobalardyń júzege asýyn qamtamasyz etý maqsatynda jumys tobyn qurýǵa kelisti.
-Biz Astana men Chelábınsk arasynda mindetti túrde jańa reıs ashamyz dep boljadyq. Ázirge aptasyna 2-3 reıs bolady dep josparlaýdamyz. Bul bıznestiń, týrısik qarym-qatynastyń artýyna jańa serpin beretinine senimdimin. Qazaqstandyq dostarǵa bizdiń usynarymyz kóp. Sizderde de Chelábınsk turǵyndaryna kórseter dúnıelerińiz kóp. Biraq EKSPO jumysymen bizge munda kelý óte qyzyq bolady, - dedi Borıs Dýbrovskıı.
Budan bólek, Chelábınsk oblysynyń aptalyǵy aıasynda konferensıa, bıznes-forýmdar kásipkerlermen kezdesýler ótedi, kelissózder júrgiziledi. Erteń «Balamaly energetıkanyń bolashaǵy: realdar men keleshegi» taqyrybynda ǵylymı-praktıkalyq konferensıa ótedi.
