Keshe QR Premer-Mınıstri Baqytjan Saǵyntaevtyń tóraǵalyǵymen ótken QR Úkimeti barysynda «Qazaqstan Respýblıkasynyń keıbir zańnamalyq aktilerine esirtki quraldary, psıhotroptyq zattar, olarǵa uqsas zattar jáne prekýrsorlar aınalymyn baqylaý máseleleri boıynsha ózgerister men tolyqtyrýlar engizý týraly» zań jobasy qabyldandy, dep habarlaıdy Qamshy.kz aqparat agenttigi.
QR ishki ister mınıstri Q. Qasymov halyqaralyq tájirıbege sáıkes, esirtkiler aınalymyn baqylaý boıynsha BUU halyqaralyq komıtetteriniń usynystary men QR Konstıtýsıalyq keńesiniń tujyrymy boıynsha tyıym salynǵan zattardyń ulttyq tizimin bekitý týraly sheshim qabyldanǵanyn málimdedi.
QR Úkimetiniń tıisti aktti qabyldaýy eldegi tyıym salynǵan esirtki quraldarynyń tizimin naryqta paıda bolyp jatqan psıhıkalyq belsendi zattardyń jańa túrlerimen shuǵyl tolyqtyrýǵa múmkindik beredi. Budan ózge, esirtkilerdiń ulttyq tizimi 88 negizgi, áleýetti qaýipti psıhıkalyq belsendi zattarmen tolyqtyrylady. Bul EAEO memleketteri men esirtkiler aınalymyn baqylaý boıynsha BUU halyqaralyq komıtetiniń baqylaýyndaǵy sıntetıkalyq esirtkilerdiń barlyq tizimin qamtýǵa múmkindik beredi.
Sonyń nátıjesinde, «Esirtki zattary týraly» zań arqyly tek baqylaýǵa alynǵan esirtkilerdiń aınalymy ǵana emes, sonymen qatar bolashaqta shyǵýy múmkin jańa túrleri de retteletin bolady.
Máseleni qaraý qorytyndysy boıynsha «Qazaqstan Respýblıkasynyń keıbir zańnamalyq aktilerine esirtki quraldary, psıhotroptyq zattar, olarǵa uqsas zattar jáne prekýrsorlar aınalymyn baqylaý máseleleri boıynsha ózgerister men tolyqtyrýlar engizý týraly» zań jobasy qabyldandy jáne Parlament qaraýyna jiberiledi.
